Team SMB nanghawod sa MCCI bowling tourney
CEBU, Philippines — Ang koponan sa San Miguel Brewery maoy milugwa nga kampiyon sa bag-ohay pang natapos nga Mandaue Chamber of Commerce and Industry (MCCI) Lord of the Pins Bowling Tournament didto sa SM City-Cebu Bowling and Leisure Center.
Mipahiluna sa ikaduhang dapit ang Oriental Port and Allied Services Corp. (OPASCOR) samtang ang Prime Movers Total Logistics ug Cermatex Manufacturing nalandig sa ikatulo ug ikaupat nga puwesto.
Gawas sa mga tropeyo, ang pambato sa SMB mibulsa sab og P10,000, samtang ang OPASCOR, Prime Movers, ug Cermatex nakadawat og P7,000, P5,000 ug P3,000 nga premyo.
Sa laing bahin, si Antonio Ynoc ug ang anak niyang si Jane maoy gikoronahang male and female high scoring champions.
Ang ubang kompaniya nga misalmot sa tulo ka adlaw nga torneyo nga kabahin sa selebrasyon sa Mandaue Business Month sa MCCI mao ang KGK Management, Uratex, Carlos A. Gothong Shipping Lines, Cebu Online News Press Corps, Worldwide Steel Group of Companies, ug AD Gothong Group of Companies.
- Latest
