CEBU, Philippines — Gipamatud-an ni Naoya “The Monster” Inoue nga angayan siya sa bag-ong naangkong titulo nga bag-ong Pound for Pound King of Boxing human sa walay kwestyon niyang pagpukan sa reigning WBC ug WBO super bantamweight champion nga si Stephen Fulton sa ikawalo ka round atol sa ilang sangka didto sa Ariake Arena sa Tokyo, Japan niadtong adlaw nga Martes.
Gawas sa maong kadaugan, si Inoue usa na ka four-weight world champion pinaagi sa wala pay tatsa nga rekord nga 25-0 nga dunay 25 KOs. Sa pagsugod palang sa ilang away, wala kaayo makapaduol si Fulton tungod sa kagumkom nga mga jabs nga gibuhian ni Inoue ug nabutang dayon sa defensive mode ang Amerikano.
Bisan ang iyang depensa wala mosalir sa mga left hooks ug right straights sa Hapon. Sa Ikapitong round, nakabawos gamay si Fulton apan sa sunod nga round gipakgang ni Inoue iyang momentum pinaagi sa nagpungasi nga atake.
Sa wala ug tuo nga kombinasyon ni Inoue napatumba niini si Fulton sa ikawalo nga round, sa pagbarog niya gimakmak siya pagusab ug gitapos sa left hook.
Human sa iyang kadaugan, wala maglangay si Inoue pagdawat sa sunod nga nanghagit kaniya. Kini walay lain kondili ang Pinoy WBA ug IBF 122-pound champion Marlon Tapales kinsa diha sa ringside anang gabhiuna.
Si Tapales (37-3, 19KOs) bag-ohay lang nakadaog pinaagi sa split-decision batok kang Murodjon Akhmadaliev niadtong Abril 8 sa San Antonio, Texas.
“I want to fight Inoue to prove to myself that I am a great champion,” hagit pang Tapales sa bag-ong P4P King.
Si Inoue isip kampeyon, mibuhi og pahiyom ug nitubag nga dili na kinahanglang langayon pa, pwede nila kining himuon ni Tapales karong tuiga.
“Let’s do this, this year,” insister pang Inoue.