Mga Pinoy table tennis players naka-silver

CEBU, Philippines — Ang Pilipinas mipakita og dalayong salida sa 2023 SEA Youth Table Tennis Championships didto sa Brunei sa dihang mibira kini og silver medal sa junior girls U19 team event.

Sila si Kheith Rhynne Cruz, Chrishien Mae Santillan, Althea Jade Gudes, ug Jelaine Monteclaro mipakyaw og daog sa tanan nilang mga duwa sa eliminasyon ning pito ka nasud nga kompetisyon nga gipasiugdahan sa Southeast Asian Table Tennis Association (SEATTA).

Ilang gipangbihag ang Singapore, 3-1, host Brunei, 3-0, ug Malaysia 3-1.

Ilang gipayaka ang Vietnam sa crossover semifinals, 3-1, sa wala pa miyukbo sa Thailand, 3-1, sa finals.

Ang silver medal maoy labing nindot nga nakab-ot sa Pilipinas sa women’s team event sa kasaysayan sa SEATTA Championships.

“The silver medal will serve as motivation to come up with more programs to discover new talents for the national team,” matud pa ni Philippine Table Tennis Federation Inc. president Ting Ledesma.

Sa wala pa mikumbati sa SEATTA, si Cruz lab-as pang mipakita'g aksiyon sa 32nd Southeast Asian Games didto sa Cambodia diin siya naapil sa national team pinaagi sa PTTF selection tournament didto sa Puerto Princesa niadtong Marso.