CEBU, Philippines — Human ni Melvin Jerusalem, ang iya na sab nga higala ug stablemate nga si Jeo Santisima ang napakyas samtang nanulong sa langyawng lapyahan.
Kini human si Santisima gibuntog sa Hapon nga si Hayato Tsutsumi pinaagi sa unanimous decision sa ilang OPBF featherweight title fight niadtong Miyerkules sa gabii didto sa Korakuen Hall sa Tokyo, Japan.
Si Tsutsumi migamit sa iyang bentaha sa gidak-on ug gitas-on aron dominahon si Santisima sa tibuok nga bahin sa 12 ka hugna nilang sangka.
Tungod niini, gilat-an ni Tsutsumi si Santisima sa scorecards sa tulo ka mga judges, 118-110, 119-109, 120-108.
Si Tsutsumi nagpabiling way pilde sud sa tulo ka duwa diin pulos mga Pinoy ang iyang gipangbiktima.
Samtang si Santisima natagak sa 22-5 (19KOs) human maparot sa ikatulong higayon sa katapusan niyang upat ka away.
Ang kapildihan ni Santisima naabot tulo ka adlaw pa lamang ang milabay human si Jerusalem nalangkatan sa iyang korona isip WBO minimumweight champion didto sa Amerika.