CEBU, Philippines — Sukad niadtong buwan sa Enero karong tuiga niabot na ngadto sa 1, 300 ka indibidwal gikan sa nagkadaiyang barangay sa Dakbayan sa Sugbo ang nipaubos sa community-based drug rehabilitation programs (CBDRP).
Kini ang gibutyag ni Jonah John Rodriguez, executive director sa
Cebu City Office for Substance Abuse (COSAP).
Matud ni Rodriguez nga nihimo sila og lapad nga koordinasyon sa kabaranggayan alang sa mga programa sa pakigbatok sa drugas .
Sayo pa, nakadawat og mga pagdayeg ang kagamhanan sa Siyudad sa Sugbo gikan sa nagkadaiyang ahensiya sa gobiyerno gumikan sa komprehensibo nga mga Barangay Anti-Drug Abuse Council (BADAC) niini ug lakip sa nidayeg mao ang mga laing nasud.
Nasayran nga regular usab ang pagduso nila og mga report ngadto sa tanang station commanders alang sa mga kampaniya nila sa pakigbatok sa drugas.
Si Rodriguez nagkanayon nga dako og tabang ang kapolisan sa paghangyo nila sa drug personalities nga mo-surrender ug mosalmot sa ilang rehabilitation program human kini nalakip sa watchlist sa Philippine National Police ug Philippine Drug Enforcement Agency.
Ang CBDRP maoy usa sa mga instrumento alang sa mga nagbisyo kaniadto nga nakaamgo na ug buot na nga magtarong sa silang kinabuhi.
Mao kini ang pipila ka buwan nga rehabilitasyon diin sa ilang mga barangay mismo ipahigayon ang nagkadaiya nga mga seminar.
Sa niaging tuig adunay kapin sa 3,000 ang mga nipaubos sa maong programa. (BANAT NEWS)