CEBU, Philippines — Nigradwar na sa niaging adlaw ang dili mominus sa 100 ka miyembro sa Barangay Peacekeeping Action Team (BPAT) sa Lungsod sa Argao sa Probinsya sa Sugbo alang sa tulo ka adlaw nila nga enhancement skills training.
Ang maong training maghatag og dugang kahibalo sa BPAT aron magamit kini panahon sa pagresponde kung adunay mga insidente sa ilang barangay.
Sa Facebook post sa lungsod mapasalamaton ang bise mayor sa Argao nga si Atty. Orvi Ortega sa tanang migahin og oras ug sakripisyo aron makaalagad sa kaluwasan ug kalinaw sa mga residente sa lungsod.
Nidugang ang vice mayor nga adunay pagahimoon nga training sa BPAT nga pagatawgon og “Crime Scene Prevention Training and Preservation of Evidence”.
Usa sa hingusgan ni Argao Mayor Allan Sesaldo mao ang pakigtambayayong sa BPAT ngadto sa kapolisan alang sa pamaagi sa pagsumpo sa mga tigpahuyot og ilegal nga drugas sa lungsod.
Gihatagan usab og certificates ang mga miyembro sa BPAT gumikan sa ilang pagkugi ug sakripisyo nga gigahin aron makumpleto ang ilang training.
Nanumpa usab kini nga tumanon nila ang ilang obligasyon aron hugot nga mahatagan og seguridad ang lungsod. (BANAT NEWS)