Sixers, Suns nakatabla

CEBU, Philippines — Ang Philadelphia 76ers ug ang Phoenix Suns mipaksit na sab sa ilang mga karibal aron tablahon ang tagsa-tagsa nila ka serye sa baraha nga 2-2 sa nagkainit nga NBA conference semifinals.

Sa East, si James Harden mipaulbo og 42 puntos apil na ang krusyal niyang 3-pointer sa hilimatyong segundos sa overtime aron aswaton ang 76ers ngadto sa makutas ug kulbahinam nga daog, 116-115, batok sa Celtics.

Si Harden way kurat nga milansang sa iyang tres sa gilay-on nga 24 ka tiil sa nahibilin nga 19 segundos sa overtime nga nakapalumpayat uban ang tumang kalipay sa bagang panon sa ilang fans didto sa Wells Fargo Center.

Duna pa untay puruhan ang Celtics nga makapuwersa og ikadunang overtime apan wala ma-counted ang potensiyal nga buzzer-beating basket ni Marcus Smart.

"I put the work in and it was all about being aggressive," matud pa ni Harden, nga mipasud og 16 sa 23 niya ka itsa apil na ang unom ka tres. "Tonight it was really do or die. We found a way to win and that's all that matters in the post-season."

Wala sab magpabitin ang MVP nga si Joel Embiid nga mikadlit og 34 puntos, samtang si Tyrese Maxey midugang ogh 14 puntos alang sa Sixers.

Sila si Jayson Tatum ug Jaylen Brown nagkumboya'g 47 puntos sa pilderong Celtics, nga maoy mo-host sa Game 5 karong Miyerkules.   

Sa West semis, si Nikola Jokic mipabuhagay og playoff career-high 53 puntos apan wala mosaler ang iyang gahum ning higayona gumikan kay ang Denver Nuggets gipahagba na sab sa Phoenix Suns, 129-124.

Sila si Kevin Durant ug Devin Booker parehong mipabuto og 36 puntos alang sa Suns.

"It's our job to protect home court," dason pa ni Booker, nga mipasa sab og 12 ka assists. "They say a series doesn't start until someone wins on the road so we're going to try to do that in game five."

Gawas nga napilde, nameligro sab si Jokic nga masuspenso human siya matawgi og technical foul tungod sa pagtukmod niya sa usa ka tumatan-aw, nga mao mismo ang tag-iya sa Suns nga si May Ishbia, human ang bola nalabog ngadto sa mga fans sa first half.

Ang Suns mipasud og 14 sa 18 nila ka itsa sa ikatulong kuwarter nga nakahatag kanila og 98-92 nga labaw padung sa pinal nga 12 minutos sa  aksiyon.

Igo lamang nakasikit ang Nuggets ngadto sa tres puntos, 118-121, gumikan kay si T.J. Warren mipasud og duha ka free throws ug wala na molingi pa sukad niadto ang Suns.