CEBU, Philippines — Gisugat og maayong balita ang mga atleta sa Pilipinas bisperas palang sa opisyal nga pagsugod sa Southeast Asian Games opening ceremonies didto sa Cambodia human nga ang Team Philippines nakakuha na og duha ka gold medals, duha ka silvers ug tulo ka bronzes.
Ang duha ka gold medals nakuha gikan sa jiu-jitsu ug kun bokator, usa ka bag-ong matang sa martials arts para sa mga Pilipino.
Dili na bag-o sa mga Filipino ang jiu-jitsu, nga usa ka matang sa combat sport pinaagi sa grappling, ground fighting ug submission holds, apan kining Kun Bokator wala kini madungog dinhi sa Pilipinas.
Mao kini ang labing una nga higayon sa kasaysayan sa Cambodia sukad nga nahimo kining miyembro sa Southeast Asia (SEA) nga mo-host aning maong paugnat sa kusog nga kalihokan.
Ang Kun Bokator usa sa mga talagsaong events nga giapil sa karon nga SEAG didto, usa kini ka matang sa martial arts sa Cambodia nga mogamit og siko, alolod, tuhod, locks ug layog. Matud pa sa Khmer Times, ang kun bokator gituohang nahulma sobra 100 ka tuig na.
Mao nga tanang mga atleta mo-compete gikan sa nagkalain-laing mga nasud sa SEA, nabag-ohan aning maong bag-o para kanila nga martial arts.
Usa niini ang Pinay Pencak Silat practitioner nga si Angel Derla kinsa maoy ikaduhang atletang Pinoy nga nakakuha og gold medal, sunod kang Kaila Napolis nga nakakuha sab og gold medal sa jiu-jujitsu.
“Two months kaming nag-isolate training and talagang inaral namin ang bokator,” matud pa ni Derla sa report sa Philstar.com.
Ang kadaugan ni Derla makapasigarbo gyud sa mga Pinoy, tungod kay iyang gilupig ang atleta sa host nga si Chanchhprvy Puth , diha mismo sa iyang tugkaran ug ilang kaugalingong martial art.
“Nakakatuwa kasi sa kanila ito nag originate,” matud pa ni Derla kinsa maoy nag-una sa women’s single bamboo shield form event.
Atol ning pagsulat sa balita, ang Pilipinas nakasungkit na og lima ka bulawang medalya.
Samtang masulob-on ang kampanya sa Askals Mens U-22 human sila napildi sa Timor Leste 3-0; natagak na sab ang men’s volleyball team sa Pilipinas human nakabangga ang Cambodia, samtang ang Filipinas Women football napildi sa Myanmar pinaagi sa penalty. Kinahanglan silang modaog batok sa Malaysia ug Vietnam aron makaabante. — IBM