CEBU, Philippines — Atubangan sa mayoriyang pro-Barangay Ginebra fans sa Smart Araneta Coliseum, gipamatud-an sa TNT Tropang Giga nga duna silay katungod paglingkod ug pagsuot sa korona sa PBA Governors’ Cup. Ang Tropang Giga mipakanaog sa Gin Kings sa trono niini 97-93.
Si Mikey Williams mikamada og 38 puntos nga dunay siyam ka three-pointers – ang kataposan niini maoy naghatag sa TNT og labaw nga dos puntos sa nahibiling 1:15 sa duwa.
Ang Best Import nga si Rondae Hollis-Jefferson maoy nagsilbing finisher sa tropa ni Coach Jojo Lastimosa kinsa nakapuntos og 18 gikan sa iyang kinatibuk-ang 29 puntos diha palang sa second half.
Sa nahibiling segundos, gipun-an pa niya ang pagduot sa samad sa Gin King pinaagi sa duha ka free throws nga nakapalabaw kanila og kwatro puntos. Ang nahibiling 3.2 segundos wala na makasalbar pa sa Gin Kings.
Ang TNT fans nga gipangunahan ni PLDT honcho Manny V. Pangilinan naghugyaw sa dakong kalipay nga naangkon ang labing unang Tropang Giga Governors’ Cup title sa franchise history. Sa paghimo niini, giputol sa TNT ang paghari-hari ni Coach Tim Cone ug Gin Kings kansang koponan dunay rekord nga upat ka korona sa kataposang lima ka edisyon sa torneyo .
“Going into the finals, I knew we have to come up with a better game to dethrone them and huge credit to the coaching staff and the players (for rising to the occasion),” matud pang Lastimosa kinsa midawat sa responsibilidad human nga si Coach Chot Reyes ni-pokus sa Gilas Pilipinas.
Ang TNT nagkupot lang og 1-2 standing sa pagsugod sa series, apan gikan adto katulo ka sagunson nilang gitambakan ang Gin Kings. – Gikan sa Philstar.com/IBM ( Banat News )