Portland napildi sa usa lang ka pamilok

CEBU, Philippines — Kulbahinam ang panagabot sa Philadelphia 76ers ug Portland Trail Blazers niadtong adlaw nga Biyernes (Sabado dinhi sa Pilipinas), kung dili pa tungod sa game-winning jump-shot ni Joel Embiid hayan nag-overtime pa sila. Sa iskor nga 120-119 napapas ang kakulba sa mga fans sa 76ers sa dihang mipusa si Embiid og jump-shot sa nagtinga na nga mga segundos sa regulasyon.

Ang mao sab nga game –winning jump shot ni Embiid wala nay dos-segundos nga nahibilin, mao ra sab ang unang higayon nga sila nakalabaw sa Trail Blazers nianang gabhiuna.

Si Embiid mihipos og 39 anang gabhiuna. Gikan palang sa unang kwarter nag-apas na ang 76ers. Sa ikaduhang kwarter palang nalubong na kini og 21 puntos. Apan sa nahibiling mga oras, mitrabaho og maayo si Embiid ug James Harden  nga napagamyan ang labaw ngadto nalang sa 13 puntos sa nahibiling says minutos sa fourth quarter.

Ang rally nilang Embiid ug Harden nipahilom sa opensa sa Portland hangtud nga usa nalay labaw niini.

Sa nahibiling 38 segundos nakaipsot si Embiid sa gwardiya nga si Jusuf Nurkic ug nakahimo og fade away jump shot nga maoy nakapadaog kanila. "I knew I had to get a bucket.  We'd fought the whole game, come back after being down by 20 to make it a one-point game — you've got to make those plays. But my teammates and my coach trust me to do my job," pamahayag pang Embiid human sa duha.

Niadtong Marso, ang Cameroonian star nga si Embiid nag-averaged og 37 puntos kada  duwa.

Nianang gabhiuna, ang mga team mates ni Embiid nga silang Harden nakatampo og 19 puntos,  Tyrese Maxey ug De'Anthony Melton tag 13 puntos kada usa samtang si Georges Niang 12 puntos.

"We just couldn't get going.We looked like we were in mud in the first half, at both ends. That's a hell of a win for us because we didn't have a lot — and you could see it. But we just hung in there long enough, and we found a way,” matud pang Sixers coach Doc Rivers.

Ang Sixers nabutang sa ikatulong pwesto sa Eastern Conference pinaagi sa ilang 44-22 win-loss record. Ikatulo na sab kini karon nga sesson nga nakadaog sila bisan nalubong og sobra 20 puntos.

"We don't quit, and we don't give up. Obviously you don't want to be down 20, but we try to find ways to stay in the game to give ourselves a chance and that's what we did tonight," puno pa ni Harden.

Ang Portland gipangunahan ni Anfernee Simons kinsa mihipos og 34 puntos nga gidayan-dayanan og walo ka three-pointers.  Mipuno sab og 24 puntos si Jerami Grant  ug 22 puntos si Damian Lillard.

Walay laing nahimo ang Portland kondili hinuktokan ang unta kadaogan nga nakabuhi pa gikan sa ilang mga kamot sa usa lang ka pamilok.