Westbrook makig-uban sa clippers

CEBU, Philippines — Hingpit nang gi-waive sa Utah Jazz si Russell Westbrook kagahapong adlawa ug plano sa nine-time All-Star nga mopirma'g kontrata uban sa  Los Angeles Clippers.

Ang 34-anyos nga guard nakuha sa Jazz gikan sa LA Lakers pinaagi sa usa ka three-team trade niadtong Pebrero 11. Mi-average siya og 15.9 puntos, 7.4 rebounds, ug 7.1 assists sud sa 52 ka duwa sa baloron niyang paglawig uban sa Lakers.

Matud pa sa ahente ni Westbrook nga si Jeff Schwartz sa Excel Sports nga ang 2017 NBA MVP motapon dayon sa Clippers kon makumpleto na ang pag-buyout sa nahibiling $47 million sa mo-expire niining kontrata.

Kon masilyohan na ang iyang pagtikang sa Clippers, maghiusa kini og balik ni Westbrook sa kanhi niya teammate sa Oklahoma City Thunder nga si Paul George.

Iya sab nga maka-uban ang laing superstar nga si Kawhi Leonard, nga kaduha nakampiyon uban sa San Antonio Spurs ug Toronto Raptors.

Ang Clippers ikaupat karon sa Western Conference bitbit ang 33-28 rekord. Ang pag-abot ni Westbrook sa ilang poder way lalis nga makapalig-on sa ilang puwersa ug makapahayag sa ilang tsansa nga maka-abot sa conference finals sa labing unang higayon.