Heat mibuak sa NBA free-throw record

CEBU, Philippines — Ang tirador sa Miami nga si Jimmy Butler maoy nangu sa record-breaking nga salida sa dihang ang Heat nakaipsot batok sa Oklahoma City Thunder, 112-111, sa NBA kagahapon didto sa FTX Arena sa Miami, Florida.

Si Butler way sipyat sa 23 niya ka free throws, ang katapusan nga iyang napasud sa pinal nga 13 segundos maoy naghatud aa Heat sa kulbahinam ug makutas nga kadaogan.

Sa kinatibuk-an, ang Heat milansang og 40 ka sagunson nga free throws aron buk-on na karaang NBA record nga 39 ka free throws nga giposa sa Utah Jazz batok sa Portland Trail Blazers niadtong 1982.

Human sa duwa, si Miami coach Erik Spoelstra miangkon nga wala siya masayud nga nakakulit diay sila og free-throw record.

"I didn't realize we hadn't missed a free throw," matud pa ni Spoelstra. "We've been a very good free-throw shooting team all year, but that's crazy."

Sa laing bahin, managlahi nga kapalaran ang nadangatan nilang Joel Embiid sa Philadelphia 76ers ug Stephen Curry sa Golden State Warriors sa ilang pagbalik og duwa.

Si Embiid mipabuhagay og 36 puntos sud lamang sa 23 minutos aron pangulohan ang  76ers ngadto sa 147-116 nga paglampaso sa Detroit Pistons.

Didto sa San Francisco, si Curry miposa og lima ka tres sa iyang 24 puntos apan nahoyhoy ang iyang abaga gumikan kay ang Warriors nahagba sa mga kamot sa Phoenix Suns, 125-113.

Didto sa Los Angeles, si Kawhi Leonard mipabuto og 33 puntos sa dihang gidominar sa Clippers ang Dallas Mavericks, 113-101.

Si Luka Doncic miharos og 43 puntos apan wala masaler ang iyang gahum ning higayona sa Mavs.   

Sa laing resulta, si Jordan Clarkson mipatuasik og 32 puntos apil niini ang krusyal niyang 9-0 run sa katapusang kuwarter nga maoy nahimong yawe sa Utah Jazz ngadto a 116-114 nga kadaogan batok sa Cleveland Cavaliers.