PEKAF Visayas qualifying tournament mosikad na
CEBU, Philippines — Ang Visayas leg sa Philippine Eskrima Kali Arnis Federation (PEKAF) Qualifying Tournament alang sa 2023 Southeast Asian (SEA) Games mo-arangkada na karong adlawa didto sa Minglanilla Sports Complex sa Minglanilla, Cebu.
Sugdan ang aksiyon sa alas-8 sa buntag apan adunay usa ka simpleng seremonyas sa pagbukas nga ipahigayon sa hapon ug pagatambongan kini mismo ni Senate President Juan Miguel “Migz” Zubiri nga mao sab ang presidente sa PEKAF. Gipaabot nga moduyog ni Zubiri sila si Minglanilla Mayor Rajiv Enad, konsehal Boyet Velez, PEKAF Executive Vice President Master Gerald Cañete, PEKAF Vice President for Central Visayas Felipe “Tyke” Abella ug PEKAF regional director Willy Bacalso.
Si mayor Enad namahayag atol sa usa ka press conference sa miaging adlaw nga malipayon ug mapasigarbuhon kaayo sila nga mo-host sa maong kalihukan ilabi kay ang ang arnis, ang national sport sa nasud, usa ka talagsaon nga martial art nga nagagikan dinhi sa Sugbo.
Sa kinatibuk-an, 455 ka arnisadors gikan sa 21 ka martial art clubs lukop Visayas ang mowadwad sa ilang ablidad ning tulo ka adlaw nga torneyo.
Gipangulohan sa mga pambato sa Sugbo, ang ubang mga partisipante nagagikan sa Samar, Leyte, Bohol, Bacolod, Iloilo, Dumaguete, ug Negros Oriental.
Ang host Minglanilla ug ang Cebu City Arnis Team mao ang dunay kinadaghanan nga mga entrante nga 45 matag usa.
Adunay 40 ka golds nga mapupo gikan sa walo ka weight divisions.
Si Master Gerald Cañete nagkanayon nga kadto lamang mga gold medalists ang mo-abante sa National Finals nga gitawag sab og “Battle of Champions” diin ang mga mananaog dunay tsansa nga morepresenta sa Pilipinas sa 32nd SEA Games karong Mayo 5-17 didto sa Phnom Penh, Cambodia.
- Latest
