CEBU, Philippines — Sila si DeMar DeRozan ug Patrick Williams mikadlit og 22 puntos matag usa samtang si Nikola Vucevic midugang og 21 puntos ug 13 ka rebounds sa dihang gipabugnaw sa Chicago Bulls ang Brooklyn Nets, 121-112, sa NBA kagahapon didto sa United Center sa Chicago, Illinois.
Gawas nga giinat ang ilang rekord ngadto sa 17-21, gipakgang sab sa Bulls ang 12 ka sagunson nga daog sa Nets.
Si Kevin Durant mipabuto og 44 puntos samtang sila si Kyrie Irving ug Seth Curry nagkumboya’g 47 puntos apan wala mosaler ang maanindot nilang salida gumikan kay ang Nets natagak sa 25-13.
Sa laing aksiyon, si James Harden mitimbre og 26 puntos ug walo ka assists samtang sila si Tobias Harris, De’Anthony Melton ug Montrezl Harrell parehong mitali og 19 puntos sa dihang gibuntog sa Philadelphia 76ers ang Indiana Pacers sud sa overtime, 129-126.
Ang 76ers (23-14) miduwa nga wala ang superstar big man nilang si Joel Embiid kay nayayay ang tiil apan bisan pa man niini ila gihapong giputol ang upat ka sunod-sunod nga daog sa Pacers.
Sa ubang mga resulta, si Evan Mobley mipasud sa iyang itsa sa pinal nga kuwatro segundos aron ituboy ang Cleveland Cavaliers ngadto sa 90-88 nga kadaogan batok sa Phoenix Suns, si Ja Morant mi-iskor og 23 uban ang walo ka rebounds sa dihang gikulata sa Memphis Grizzlies ang Charlotte Hornet, 131-107, samtang si Anthony Edwards mipatuasik og 32 puntos aron panngulohan ang Minnesota Timberwolves batok sa Portland Trail Blazers, 113-106.
Wala sab magpabitin si C.J. McCollum nga mikimada og 28 puntos aron agakon ang New Orleans Pelicans batok sa Houston Rockets, 119-108.
Si Jalen Brunson miharos og 38 puntos ug si Julius Randle miamot og 25 puntos ug 13 ka rebounds sa dihang ang New York Knicks nakaipsot sa San Antonio Spurs, 117-114, samtang si Paolo Banchero mikolekta og 25 puntos, walo ka rebounds ug pito ka assists aron giyahan ang Orlando Magic ngadto sa 126-115 nga pagpakaging sa Oklahoma City Thunder.