Melindo molusad og inutok nga away

CEBU, Philippines — Nasayud si kanhi world champion Milan “El Metodico” Melindo sa kalibre sa iyang kontra mao nang gawas sa pisikal niyang pagbansay-bansay, iya sab nga gikondisyon ang iyang huna-huna alang sa umaabot niyang away batok ni Chaiwat Buatkrathok sa Thailand sunod semana.   

Si Melindo (38-5, 14KOs) makigbinukbukay ni Buatkrathok (38-7, 25KOs) sud sa 10 ka hugna alang sa bakanting OPBF Silver featherweight belt sa main event sa "Prime Fight II" sa Prime Stags Sports Boxing Promotions karong Enero 11 didto sa Cebu City Sports Center.

Si Melindo katapusang mipakita og aksiyon atubangan sa mga Sugbuanon niadtong 2017 diin iyang gibuntog ang South African nga si Hekkie Budler pinaagi sa split decision aron sakmiton ang IBF ug IBO flyweight titles didto sa Waterfront Cebu City Hotel and Casino.

Atol sa usa ka press conference kagahapon sa Cafe Point, ang 34-anyos nga si Melindo miangkon nga dili puydeng mapakyas siya niyang labing lisud nga hagit sa iyang kampanya nga mamahimong world champion og usab.

"Kinahanglan dili mokompiyansa kay dili pipitsugin, dili basta-basta ang ako kontra," matud pa ni  Melindo.

"This is a big challenge for me," padayon pa ni Melindo.  "I have to prepare my mind because my opponent is a hard-puncher if you look at his record. I have to play mind games to frustrate him. I must be wise."

Sa iyang bahin, si Prime Stags Sports vice president Pocholo Padilla nagkanayon nga ang pagparang nila ni Melindo batok sa usa ka kahadlokang kontra usa ka dakong risgo.   

"It's a risk but we want to take the fastest route for him to be able to fight again for a world title in the WBC," matud pa ni Padilla. Sa supporting main event, ang way pildeng WBF Australasian flyweight champion nga si Kit Ceron Garces (5-0, 4KOs) makigharong batok ni Noli James Maquilan (4-1, 3KOs) sa Compostela Valley.

"Akong ikapasalig nga malingaw gyud ang mga manan-aw sa among away. Ako sab paningkamotan nga ma-knockout nako ang akong kontra," dason pa ni Garces.