Umaabot nga 'king tiger' sa UST mapasigarbuhon Isip Carolinian

Nic Cabañero nagbalik lantaw sa iyang kagahapon sa USC nga mapasalamaton

CEBU, Philippines — Ang Sugbuanong si Nicael Cabañero, nga usa sa mga sumusulbong nga bitoon sa Philippine collegiate basketball, nagbalik lantaw sa iyang kaagi sa University of San Carlos (USC)-North Campus uban ang mapasalamaton nga kasingkasing.

Wala masayri sa kadaghanan nga ang UAAP Season 85 scoring champion nga maoy gitatakan nga mamahimong sunod nga "King Tiger" sa University of Santo Tomas (UST) usa ka Carolinian nga nagsugod sa iyang pagbiyahe sa dalan sa basketball uban sa USC SBP team sa dihang nag-edad pa lamang siya og 10 anyos niadtong 2014.

“I’m very proud nga gikan ko dire na school. Never nako gihuna-huna nga layo na kaayo ko og naabtan ako na lang ni kalimtan," matud pa sa 19-anyos nga si Cabañero. "I'm happy nga gi-recognize gihapon ko sa ako school. This is where I learned the values of loyalty, discipline, and hard work. Without USC, I think dili nako maabot kung unsa ko karon."  Human sa USC, si Cabañero nakaduwa uban sa Sacred Heart School-Ateneo de Cebu (SHS-AdC) Magis Eagles sa CESAFI ug sa San Beda Red Cubs sa NCAA diin siya nakampiyon tulo ka higayon.

Miabli si Cabañero og bag-ong panid sa iyang karera human nagpahigot sa UST Tigers sa prestihiyosong UAAP  diin gitugyanan dayon siya sa usa ka ka dakong responsibilidad isip co-captain sa team sa iyang rookie season .

“At a young age, I’m one of the leaders of the team as the co-captain. I’m the voice of the team although I’m not that vocal, I’m more on actions. My parents and coaches also guided me to improve my leadership skills," dason pa sa 6'2" nga wingman gikan sa dakbayan sa Lapu-Lapu kansang mga ginikanan lumad gikan sa Inabanga, Bohol.

Luyo sa eksplosibo niyang salida sa bag-ohay ang natapos nga UAAP season diin siya mi-average og 17.62 puntos, 7.14 rebounds, 3.14 assists, ug 1.0 steal sud sa 13 ka duwa uban sa Tigers, si Cabañero nakadawat og tanyag gikan sa mga internasyonal nga liga sama sa Japan B. League ug Korean Basketball League (KBL).

Apan si Cabañero nagkanayon nga kinahanglan usa niya og pasensiya ning puntoha ilabi na kay daghan pa siya'g angayan nga ipalambo sa iyang abilidad.

“It’s very fascinating to get offers abroad. If that happens then I’m very thankful sa opportunity," batbat pa ni Cabañero. "Pero I want to be patient first and focus on improving.”   

Sama sa ubang magduduwa, si Cabañero nagdamgo sab nga makatikang sa PBA ugma damlag, butang nga iyang trabahoon ug paningkamotan og maayo.

"When you set a goal, it's a process. You need to work for it because it takes a lot of effort before you will achieve it. That's the kind of direction I'm going to take," dason pa niya.      

Daghan og nakat-onan gikan sa iyang mga kasinatian, si Cabañero mipaambit og bulawanong tambag ngadto sa mga nangambisyon nga mokulit og pangan sa natad sa basketbol sa umaabot.

"I want to inspire the aspiring players nga despite your age ug taga probinsiya ka, you must keep on aiming high,"padayag pa ni Cabañero. "Never give up. Ayaw kahadlok sa bisan unsa na obstacles na inyong maagian. You will meet failures along the way and you have to be prepared for it. Most importantly, always pray to God."