CEBU, Philippines — Ang City of Bogo Science and Arts Academy (CBSAA) Trailblazers ug ang Sacred Heart School-Ateneo de Cebu (SHS-AdC) Magis Eagles naglaraw nga moangkon og luna sa finals sa ilang pakigsangka batok sa managlahing kontra sa Final Four sa junior division sa 2022 Cebu Schools Athletic Foundation, Inc. (CESAFI) basketball season karong adlawa diha sa Cebu Coliseum.
Ang Trailblazers, nga maoy nanghawod sa eliminasyon human mikumpleto og makasaysayanong 9-0 sweep, makigpinaksitay sa University of the Visayas (UV) Baby Lancers sa alas 5:15 sa hapon samtang ang Magis Eagles makogharong sa University of Cebu (UC) Baby Webmasters sa alas 6:45 sa gabii.
Parehong armado og twice-to-beat advantage, ang way pildeng Trailblazers ug ang defending champion Magis Eagles buot nga dispatsahon dayon ang ilang mga karibal aron mag-abot sila sa kampiyonato.
Nakapabor sila niining aspeto gumikan kay ila na mang gipayaka ang ilang mga kaatbang sa miagi nilang engkuwentro.
Ang Trailblazers mipaluhod sa Baby Lancers, 76-70, niadtong Nobiembre 20. Usa ka semana ang milabay, ang Magis Eagles mipakaging sa Baby Webmasters, 85-78.