CEBU, Philippines — Si Royce O’Neale mipasud sa iyang follow-up shot sa nahibilin nga punto siyete segundos sa duwa aron aswaton ang Brooklyn Nets ngadto sa 109-107 nga kadaogan batok sa Portland Trail Blazers sa NBA kagahapon didto sa Moda Center didto sa Porlland, Oregon.
Kumpletos rekados ang gipakitang pagkamabayanihon ni O'Neale uban ang triple-double nga 11 puntos, 11 ka rebounds ug 11 sab ka assists.
Si Kevin Durant mipabuhagay og 35 puntos alang sa Nets. Dako sa og natampo sila si Yuta Watanabe nga midugang og 20 puntos ug Ben Simmons nga mikimada og 15 puntos.
Nakatabla unta ang Blazers, 107-107, human sa three-point play ni Jusuf Nurkic sa pinal nga 6.5 segundos apan si O'Neale mibaraw sa ilang tinguha nga maka-overtime.
Si Damian Lillard maoy nangu sa pilderong Portland uban ang 25 puntos ug 11 assists.
Didto sa Sacramento, si De’Aaron Fox mikadlit og 28 puntos ug walo ka assists sa dihang gilampaso sa Sacramento Kings ang San Antonio Spurs, 130-112, alang sa ikalima nilang sagunson nga daog.
Si Malik Monk mitimbre og 26 puntos, samtang sila si Harrison Barnes ug Domantas Sabonis parehong mitali og 16 puntos ug walo ka rebounds alang sa Kings.
Si Devin Vassell mipabuto og 29 puntos samtang sila si Keita Bates-Diop ug Tre Jones nagkumboya'g 31 puntos alang sa nagkagidlay nga Spurs nga naparot sa ikasiyam nga higayon sa miagi nilang 10 ka duwa.