CEBU, Philippines — Ang Cebu Schools Athletic Foundation, Inc. (CESAFI) pinaagi sa Commissioner's Office niini nakahukom nga paluyohan ang 68-67 nga kadaogan sa University of San Jose-Recoletos (USJ-R) Jaguars batok sa University of Southern Philippines Foundation (USPF) Panthers atol sa kontrobersiyal nilang duwa niadtong Domingo sa Cebu Coliseum.
Nakapanimaho na unta og daog ang USPF uban ang 67-65 nga labaw sa pinal nga 1.2 segundos sa dihang si Elmer Echavez sa USJ-R, human madawat ang bola duol sa midcourt, mi-dribol kausa dayong itsa unya maayong pagkasud sa bola dayong sirbato sa buzzer nga nagtukmod ni Echavez ug tibuok puwersa sa Jaguars ngadto sa usa ka selebrasyon sud sa korte nga mura'g nakadaog sila og kampiyonato. Ang buzzer-beater ni Echavez nakuha hinoon og protesta gikan sa habig sa USPF ug sa mga dismayado niining fans, butang nga gikonseidera sa liga.
Aron mahatagan og katin-awan ang tanan, si CESAFI commissioner Felix "Boy" O. Tiukinhoy, Jr. mipatawag og usa ka emergency meeting sa tanang mga hintungdan kagahapon sa buntag.
Gawas ni Tiukinhoy, mitanbong sab ang iyang mga deputy commissioners nga sila si Atty. Jesus "Boyet" Velez, Danny Duran, ug Danny Villadolid, ang tulo ka mga reperi sa duwa ug ang ilang hepe nga si Ed Aguelo, ug ang mga table officials.
Sigun sa ilang report nga gisumite ngadto ni CESAFI President Bernard Nicolas Villamor sa CIT-U ug vice president Atty. Paulino Yabao, nga mao sab ang presidente sa USPF, wala silay nakitang iregularidad sa desisyon sa mga reperi pag-counted sa buzzer beater in Echavez ug sakto lamang ang ilang aksiyon sa maong sitwasyon.
"In our discussion and review, we are unanimous also in our findings that there was no irregularity on the part of the referees nor the table officials in counting the 3-point basket made by USJ-R player Elmer Echavez," padayag pa ni Tiukinhoy sa ilang report.
"Based on our 2023 Amended CESAFI Ground Rules, there is no rule that allows a review of the decision of the referee/s using video footages. Thus, the Commissioner's Office affirms the decision of the referees in counting the 3-point buzzer beater of USJ-R."