Trailblazers 6-0 ang tirade

CEBU, Philippines — Ang City of Bogo Science and Arts Academy (CBSAA) Trailblazers naglaraw nga inaton ang way pilde nilang ratsada ngadto sa unom ka duwa sa dihang ilang sangkaon ang nagkagidlay nga University of San Carlos (USC) Baby Warriors sa 2022 Cebu Schools Athletic Foundation, Inc. (CESAFI) men's basketball tournament karong adlawa sa Cebu Coliseum.

Sugdan ang ilang sangka sa alas 5:15 sa hapon.

Ubos sa paggiya ni coach Leode Garcia, ang Trailblazers lab-as pang mihaw-as gikan sa makapakurat nga 82-79 nga kadaogan batok sa defending champion Sacred Heart School-Ateneo de Cebu (SHS-AdC) Magis Eagles sa kulbahinam nga sangka tali sa way pildeng mga koponan niadtong Sabado, Nobiyembre 12.

Mao kini ang nagtukmod sa Trailblazers ngadto sa solong liderato sa juniors division bitbit ang perpektong 5-0 nga baraha.

Samtang ang Baby Warriors nagtingkagol sa kinatumyang bahin kay bokya pa gihapon sud sa lima ka duwa.

Human sa bugno tali sa CBSAA ug USC, ang USC Warriors nanghinaut nga isaka ang ilang 3-5 record sa dihang ilang harongon ang Cebu Institute of Technology-University (CIT-U) Wildcats sa main game sa alas 6:45 sa gabii.

Ang Warriors ug Wildcats nakahiagum og managlahing kalapalaran sa miagi nilang duwa.

Ang Warriors mibuntog og usab sa University of Cebu (UC) Webmasters, 65-60, samtang ang Wildcats gilat-an sa University of the Visayas (UV) Green Lancers, 69-90, hinungdan nga padayon kining nangiwit uban ang unom ka pilde nga giatbangan og usa pa lamang ka daog.