CEBU, Philippines — Gipaksit sa Team Garing ang Polog, 68-57, aron paglangkat sa kampiyonato sa Inter-Barangay senior category B sa 11th Mayor Teresa "Nene" P. Alegado Cup Fiesta Basketball League didto sa Consolacion, Cebu.
Si Michael Villamor miwadwad og 19 puntos alang sa Garing, nga kontrolado kaayo ang duwa sukad sila misirit ngadto sa sayong 20-13 nga labaw.
Ang Polog nakasikit sa halftime, 37-41, apan dali nga miresbak ang Garing aron pag-angkon og balik sa otso puntos nilang bentaha, 57-49, human sa tulo ka kuwarter.
Padayong nanginit ang Garing sa naghinapos nga bahin sa duwa aron pagkab-ot niini og 11 puntos nga kalamposan.
Si Carl Jay Mangilaya miamot og 16 puntos samtang si Gilbert Lauron dunay nuybes puntos alang sa Garing.
Si Franie Suson mihipos og 15 puntos samtang sila si Joseph Pepito ug Filhart Suson nagkumboya'g 21 puntos sa pilderong kawsa.
Hugtanong gipaluyohan sa Consolacion LGU ubos sa pagpangu ni mayor Teresa "Nene" P. Alegado ug bise vice mayor Rey Damole, ang usa ka bulan nga paugnat sa kusog gituyo aron pagdugang og kasadya sa tinuig na pista sa lungsod karong Oktubre 29 agi'g pagyukbo sa minahal nilang patron nga si San Narciso.
Sa labing unang higayon, si Paul Alelu Flores nagsilbeng overall sports chairman ug league commissioner nga sikit nakigtrabaho nilang konsehal Marilou Casul ug Lalina Villo Yu, ABC President Wesley Alimoren ug SK Federation President Carlos Donn Flores. Sila si coach Lee Mhar Dahil ug Agvin Jugan mitabang pagdapagan sa mga duwa isip deputy commissioners uban ni technical head Louie Cuenca.