CEBU, Philippines — Ang Garing mipalayas sa Tolotolo sa ilang trono, 95-82, aron paglugwa nga kampiyon sa SK category B sa 11th Mayor Teresa "Nene" P. Alegado Cup Fiesta Basketball League didto sa Consolacion, Cebu.
Si Devon Alin mipabuto og 24 puntos samtang sila si Von Xyle Tundag ug Clyde Alin mikadlit og 23 puntos matag usa alang sa Garing nga milayat ngadto sa sayong 24-19 nga labaw.
Milusad dayon ang Garing og nagdilaab nga opensiba sa naghinapos nga bahin sa aksiyon aron pagpupo ig 13 puntos nga kadaogan.
Si Jay Harold Herbito mipatuasik og 42 puntos apan nakawang ang ilang paningkamot sa habig sa Tolotolo.
Sa SK category A, ang Pitogo nakalingkawas batok sa Cabangahan, 98-95, sa tinagakay nilang semifinal match aron pag-angkon og katungod nga makigharong batok sa Pulpogan sa best-of-three championship.
Si Froilan Maglasang maoy bida sa Pitogo uban ang 32 puntos samtang sila si James Genos ug Johnloyd Pepito nagkumboya'g 31 puntos.
Sa laing resulta, si Russel Moneva mipabuhagay og 46 puntos sa dihang gilampaso sa Pulpogan ang Lamac, 104-79, sa pasiunang duwa sa ilang best-of-three senior category A finals. Si JC Escalona midonar og 20 puntos samtang si Rexon Moneva midugang og 13 puntos timaan sa balanseng ataki sa Pulpogan.