CEBU, Philippines — Sa makasaysayanon nga lakang, ang University of the Philippines (UP) Cebu moapil sa Cebu Schools Athletic Foundation, Inc. (CESAFI) sa labing unang higayon.
"UP Cebu has applied for CESAFI membership and it has been approved by the Board," matud pa ni CESAFI commissioner Felix "Boy" O. Tiukinhoy, Jr. "It's a welcome development, an additional mileage for the league knowing that we can draw additional fans from the UP community."
Karon nga naplastada na ang tanan, ang UP Cebu nagpanikad nang molusad sa ilang varsity program karong Septiembre 23 didto sa ilang Performing Arts Hall.
Usa kini ka masadya ug mahinungdanon nga panagtapok-tapok sa mga atleta, coaches, ug sports fans sa dihang ang CESAFI pormal nga moabli sa ilang pultahan sa UP Cebu isip labing bag-o niining miyembro.
Tangkud 250 ka mga estudyanteng atleta (200 sa kolehiyo ug 50 sa sekondarya) ang ipresenta sa bonggang kalihukan nga pagatambongan sa mga sakop sa UP men's basketball team, ang Fighting Maroons nga mikulit og kasaysayan niadtong Mayo 13 human ilang gibuntog ang Ateneo Blue Eagles aron putlon ang 36 ka tuig nilang huwaw sa titulo sa University Athletic Association of the Philippines (UAAP).
Si UP Cebu Chancellor Atty. Leo Malagar nagkanayon nga ang maong programa nagbuhi sa legasiya sa tunghaan nga makahulma og mga varsity teams nga midominar sa mabulokon nilang kasaysayan
Laraw niini nga makakaplag ug makabansay-bansay og mga estudyante aron mamahimong dekalibreng mga atleta nga morepresenta sa UP Cebu sa mga kompetisyon gikan sa provincial ngadto sa regional, national, ug international level.
“Sports competitions and athletics bring happiness, unity and solidarity to the whole UP community,” matud pa ni Malagar.
Pinaagi niining inisyatiba, ang UP Cebu duna nay mga teams nga iparada sa mga torneyo sa CESAFI apil na niini ang basketball, football, badminton, table tennis, swimming, chess, ug dancesport. Ang tunghaan magporma sab og mga teams alang sa scrabble, softball, ug esports. Nangandam sa malisud nga hagit sa unahan, masukod ang katakos sa mga atleta sa UP Cebu sa giatngan nga comeback season sa CESAFI nga gikatakdang mosikad karong Oktubre 15 didto sa Cebu Coliseum.