Sarok Weavers misuwat og laing kasaysayan

Labing unang back-to-back champions sa PSL U21

CEBU, Philippines — Mipatik og laing dungog ang Consolacion Sarok Weavers sa libro sa kasaysayan.

Luyo sa pagkamabayanihon ni Rovello Robles, gibuntog sa Sarok Weavers ang Sherilin-Unisol Mandaue City Plastic Men, 81-79, sa tinagakay nga duwa sa ilang best-of-three finals aron labngkaton ang korona sa Visayas division sa 2022 Pilipinas Super League (PSL) 21 Under Tournament niadtong Martes sa gabii didto sa Cebu City Sports Institute (CCSI) sa Barangay Sawang Calero.

Gumikan niini, ang Sarok Weavers nahimong labing unang back-to-back champions sa PSL U21.

Salamat ni Robles.

Human gitabla ni Zylle Zabellon sa Mandaue ang iskor, 79-79, sa pinal nga 17 segundos, si Robles wala mag-usik bisan usa ka segundo pag-ataki sa basket human makadawat og nindot kaayong assist gikan ni team captain Paulo Dalumpines nga marunong kaayong mipasa sa bola human siya natrangkahan sa solidong depensa sa Mandaue.

Sa labing dako nga shot sa iyang kinabuhi, si Robles mipasud sa malisud niyang layup nga nagduso sa tibuok Consolacion bench nga gipangulohan sa ilang mayor nga si Teresa "Nene" P. Alegado ngadto sa usa ka mainit nga selebrasyon sa nahibilin nga sayes segundos sa sikit kaayong duwa.

Duna pa unsay tsansa ang Mandaue nga kawaton ang daog apan ang 3-pointer ni Cabellon igo lamang mihawok sa ring dayong kapupos sa oras.

Si Robles mitapos uban ang otso puntos, unom ka rebounds ug duha ka assists sa sa duwa nga dili niya malimtan sa tibuok niyang kanabuhi.

Nindot sab kaayong midala sa iyang papel si Dalumpines human gipangulohan ang Sarok Weavers bitbit ang 18 puntos, lima ka rebounds ug unom ka assists. Dalaygon sab si Visayas MVP Matthew Flores nga mitimbre og 15 puntos, siyam ka rebounds ug duha ka assists.     Mihimo sab og kasikas si Keaton Taburnal  uban ang 15 puntos ug tulo ka rebounds ingon man si Froiland Maglasang nga midugang og 13 puntos, duha ka rebounds ug upat ka assists alang sa Sarok Weavers, nga madasigon kaayong mibangon human mabiyai og siyete puntos, 50-57, sa tunga-tungang bahin sa ikatulong kuwarter.

"I’m so happy and blessed that won the championship again," matud pa ni Sarok Weavers coach Paul Alelu Flores, nga kanhi usa sab ka collegiate standout nga nakadaog og duha ka sagunson nga titulo uban sa Far Eastern University (FEU) Tamaraws sa iyang panahon sa UAAP kauban si Arwind Santos nga usa na karon ka PBA superstar. "I give praise and glory to the Lord. I know it was everybody’s ball game but thank God he gave it to us."

"Both championships were very sweet and worth remembering for," padayon pa ni Flores. "But what makes it extra special this time is that we played and won it in front of our fellow Consolacionanons, our loved ones, and all the people who believed in us."

Ang Sarok Weavers mao sab ang naghari sa labing unang PSL U21 Aspirants Cup nga gipahigayon didto s aRoxas, Zamboanga del Norte upat ka bulan na ang milabay.

"Until now, it haven't sink in my mind yet that we're already champions because as you can see it was a very close game," batbat pa ni coach Lee Mhar Dahil. "But I would like to say that it takes a lot of courage, practice and perseverance to get here."

"We thank God for giving us this reward to the hard work of our players. I'm proud and happy that all our efforts and sacrifices are really worth it in the end. We truly deserved this championship," dugang pa ni Dahil.

Sama ni Flores, si Sarok Weavers team manager Marc Malazarte naglutaw pa sab sa panganod sa himaya tungod sa naglagiting nga kalamposan nga ilang nakab-ot.

"The best in the Visayas. This championship goes out to our beloved Consolacion and to everyone who believed, supported, and sacrificed for the team," dason pa ni Malazarte.

Malisud pa hinoon nga tahas ang sagubangon sunod sa Sarok Weavers sa labing unang PSL U21 National Finals karong Septiembre 2-5 diin ilang sangkaon ang Mindanao champion Davao Occidental Dreamers ug Luzon champion Pampanga Delta.