CEBU, Philippines — Ang Truck N' Trail Transport Services, Inc. mitunaw sa Sherilin Plastics, 81-70, aron langkaton ang kampiyonato sa Metro Cebu Basketball League (MCBL) Season 6 niadtong weekend didto sa City Sports Club-Cebu gym. Si Jahrey Ceniza maoy nangu sa Truck N' Trail ni coach Phil Mercader ug team owner Dondon Aropo uban ang 16 puntos ug siyam ka rebounds hinungdan nga siya maoy gibayaw nga Finals MVP.
Sila si EJ Conahap ug JP Dalumpines mikadlit og 13 puntos matag usa alang sa Truck 'N Trail nga kontrolado kaayo ang duwa sukad misutoy sa sayong 23-16 nga labaw.
Misamot pa ang kainit sa Truck N' Trail sa ikaduhang kuwarter aron paburoton ang ilang bentaha ngadto na sa 23 puntos sa halftime, 49-26. Wala na sila molingi pa sukad niadto.
Si Joseph Cabahug mi-iskor og 12 samtang si Jeric Gonzaga miamot og 10 puntos sa balanseng ataki sa Truck N' Trail. Mao kadto ang ikaduhang dako nga korona sa Truck N' Trail ning tuiga. Niadtong Mayo, nanghawod sila sa Mayor Michael Rama Basketball Invitational League 2022 didto sa Cebu City Sports Institute.
Si Albert Ardiente mihipos og 16 puntos alang sa Sherilin samtang sila si Jeco Bancale, Zylle Cabellon ug John Velasco nagkumboya'g 37 puntos sa pilderong kawsa.