Human sa ultimatum ni durant tag-iya sa nets midapig nilang nash ug marks

CEBU, Philippines — Gidapigan ni Brooklyn Nets team owner Joe Tsai ang ilang head coach nga si Steve Nash ug general manager Sean Marks human miulbo ang taho nga gihatagan sila og ultimatum ni NBA superstar Kevin Durant.

Human gidetalye sa The Athletic ang miting nilang Durant ug Tsai didto sa London diin si Durant mipadayag nga mohawa siya sa team kon ugaling dili matangtang sila si Nash ug Marks sa ilang puwesto, si Tsai dali nga mihatag og katin-awan sa iyang posisyon kabahin sa isyu.

"Our front office and coaching staff have my support," matud pa ni Tsai sa iyang Twitter. "We will make decisions in the best interest of the Brooklyn Nets."

Ang desisyon ni Tsai tataw nga nagsunog sa katapusang taytayan nga nagkonekta sa Nets ug ni Durant nga niadto pang Hunyo gustong magpa-trade.

Daan nang mipahibawo ang 33-anyos nga si Durant nga nawad-an na siya og pagsalig sa direksiyon sa team human ang Nets gi-sweep sa Boston Celtics sa NBA playoff sa miaging season.

Si Durant, ang 2014 MVP nga duha ka higayon nahimong NBA champion, padung mosud sa unang seson sa upat ka tuig nga contract extension nga iyang gipirmahan uban sa Nets sa miaging tuig. Mibalor kini og $198 million.

Ang Celtics, Miami Heat ug Toronto Raptors maoy nag-unang mga kandidato nga mokuha ni Durant.

Sa iyang bahin, ang 48-anyos nga si Nash nahimong head coach sa unang higayon tungod sa oportunidad nga gihatag kaniya sa Nets niadtong 2020. Ang two-time MVP nga garbo sa Canada migiya sa Booklyn ngadto sa 92-62 win-loss record sa miaging duha ka season.   

Samtang ang 46-anyos nga si Marks maoy labing unang player sa NBA gikan sa New Zealand. Nakadaog siya og duha ka titulo, pulos gikan sa San Antonio Spurs niadtong 2005 ug 2014. Nagsilbe siyang assistant general manager sa Spurs niadtong 2015-2016 sa wala pa kuhaa nga GM sa Nets.