Sarok Weavers 5-0 na

CEBU, Philippines — Si Rovello Robles mipakita sa labing nindot niyang duwa sa Consolacion human kini milansang og career-high 22 puntos uban ang 10 ka rebounds sa dihang gilampaso sa defending champion Sarok Weavers ang OCCCI-Ormoc Sheermasters, 79-50, aron pagpabiling way pilde sa 2022 Pilipinas Super League (PSL) 21 Under-VisMin leg niadtong Dominggo sa gabii didto sa Barangay Lawaan I gymnasium sa dakbayan sa Talisay.

Mi-average lamang og 11.4 puntos ug 5.6 rebounds padung sa duwa, si Robles nagmangtas diin kini mipasud og siyam sa 12 niya ka itsa aron pangulohan ang  Sarok Weavers ngadto sa ikalima nilang sagunson nga daog.

Si big man Matthew Flores miposte og double-double nga 11 puntos ug 11 ka rebounds alang sa Sarok Weavers nga dalaygon na sab kaayo ang teamwork aron paghugtan ang ilang pagkupot sa solong liderato bitbit ang perpektong 5-0 nga baraha.

Kontrolado kaayo sa Sarok Weavers ang duwa sukad sila mi-abante og siyete puntos sa sayong bahin, 19-12. Padayon nilang gikastigo ang Sheermasters sa ikaduha ug ikatulong kuwarter sa wala pa gitak-op ang aksiyon pinaagi sa nagkayong 23-11 rally nga miresulta ngadto sa 29 puntos nga demolisyon.

Si Ray Charles Libatog dunay 13 puntos ug siyam ka rebounds sa Sheermasters nga natagak sa 2-3.

Sa laing kumbati, si Jose Zaldy Dizon mipupo og 18 puntos ug unom ka rebounds samtang si Acer Rom Michael Go mitimbre og 16 puntos, unom ka rebounds ug duha ka assists sa dihang gibugha sa Sherilin-Unisol Mandaue City Plastic Men ang San Fernando Buffalos, 89-77.

Si Christopher Erick Isabelo midonar og 10 puntos, tulo ka rebounds ug tulo sab ka assists sa dihang gitabla sa Plastic Men ang ilang record ngadto sa 3-3.

Ang Mandaue naglabaw lamang og dos puntos sa halftime, 52-50, apan gilabhan ang San Fernando sa final half, 37-27, aron pagkadlit niini og 12 puntos nga kalamposan.

Si Osias Andrew Padilla mihipos og 17 puntos, 12 ka rebounds ug duha ka assists, si Jhon Lyster Mamalia mitali og 12 puntos, upat ka rebounds ug tulo ka assists samtang si Franzel Basalo midugang og 10 puntos ug upat ka rebounds apan nakawang ang ilang paningkamot gumikan kay ang Buffalos naglunang sa ikaupat nilang pilde sud sa unom ka duwa.