Demolisyon misugat sa Poblacion Occidental Summer League

CEBU, Philippines — Duha ka demolisyon nga kadaogan ang misikad sa Poblacion Occidental Summer League 2022 ning bag-ohay pa lamang didto sa Consolacion covered court.

Si France Dave Fernando mikadlit og 16 puntos sa dihang gilampaso sa Calachuchi ang Pandayan, 92-63, sa 26-under division.

Ang Calachuchi abante lamang og kuwatro puntos sa sayong bahin, 21-17, apan milusad og eksplosibong 30-11 rally sa ikaduhang kuwarter aron paburoton ang ilang labaw ngadto na sa 23 puntos sa halftime, 51-28. Wala na sila molingi pa sukad niadto.

Si Aidan Quiño maoy nangu sa pilderong Pandayan uban ang 30 puntos.    

Sa 27-above category, si Ailo Bham Alberca mipabuto og 24 puntos aron pangulohan ang Capao ngadto sa 100-60 nga pagmasaker sa Ibabao.

Labaw og 26 puntos human sa first half, 48-22, nagpadayon ang kainit sa Capao aron ilubong ang Ibabao og 40 puntos human sa duwa.     Si Jonathan Monera maoy nangu sa Ibabao bitbit ang 16 puntos.

Ang torneyo giorganisa sa mga opisyales sa Sangguniang Kabataan sa Poblacion Occidental ubos sa liderato ni SK chairperson Cassey Maglasang. Gipaluyohan kimni ni mayor Joannes "Joyjoy" Alegado, vice mayor Teresa "Nene" Alegado, ug barangay captain Hercules Aligno.

Ang tanang mga duwa ubos sa superbisyon ni league commissioner Mark Niño Gonzaga, nga kanhi sakop sa University of the Visayas (UV) Baby Lancers, inabagan ni deputy commissioner Bryan Burlaos.