CEBU, Philippines — Si WBO bantamweight champion Paul Butler nagkanayon nga bisan gamay wala siya'y gibating kahadlok nga makigbinubukbukay ni Naoya Inoue ibabaw sa ring kon mahatagan og oportunidad.
Ang gikaintapang Japanese "Monster" nga si Inoue bag-ohay pang mipatukay-ang ni Nonito "The Filipino Flash" Donaire sud lamang sa duha ka hugna aron idugang ang korona ni Donaire sa WBC sa iyang duha ka bakos sa IBF ug WBA.
Human sa makalisang niyang pagpalukapa ni Donaire, si Inoue mipadayag dayon sa iyang interes nga nakigharong ni Butler nga mao na lang karon ang babag sa iyang damgo nga mamahimong undisputed bantamweight champion.
Apan sigun sa mga komento sa uban, daw sama ra nga gilawog ni Butler ang iyang kaugalingon sa usa ka liyon kon mangahas kini sa pakigsangka batok ni Inoue.
Gikataw-an lamang hinoon ni Butler ang tanang mga kantiyaw nga iyang nadawat gikan sa iyang mga kritiko ug niadtong mga wala nagtoo kaniya.
“I’ve read all sorts of comments and predictions about the fight, already: ‘Butler has a death-wish’, ‘Inoue to win by murder’ and agreeing to the fight would be like ‘Signing someone’s death warrant,” dason pa ni Butler.
“He hits very hard but what’s the worst that can happen? He knocks me out. I’ve been stopped before and let me make it clear, I will be going into that fight believing I can win. I will be walking to the ring believing, as I always do, that I can win the fight and become the undisputed bantamweight champion of the world.”
Midugang si Butler nga wala siya'y problema nga makigsinukmagay ni Inoue bisan og adto pa sa tugkaran niini ipahigayon ang away.
“I want the fight in Japan, I would be silly not to. If the fight could be made over here, fine, but if I get extra for fighting in Japan, then that’s what I’ll do," batbat pa ni Butler. “Hopefully we can get this big fight.”