CEBU, Philippines — Ang Don Bosco Technical College (DBTC) miwani sa Don Bosco Boys Home (DBBH) sa Liloan, 2-0, sa tinagakay nga kampiyonato tali sa mga Bosconians aron sakmiton ang titulo sa Palarong Pambansa Football Bubble didto sa Cebu City Sports Center kagahapong adlawa.
Nalangkat sa DBTC ni coach Glenn Ramos ang korona bisan og nagsandig sila sa ilang mga second stringers gumikan kay ang unom sa ilang first 11 wala makaduwa tungod kay nanga-injured.
"Ang uban nakong mga sinalinagan na-injured, may gani ni-click ang among second stringers,” matud pa ni Ramos.
Human parehong wala maka-iskor ang duha ka habig sa first half, ang DBTC miduwa nga mas agresibo hinungdan nga si Joross Tabar mipansak sa unang goal sa duwa sa ika-41 nga minuto.
Mihimo sab dayon og kasikas si Richard Songalia nga milansang og laing goal sa ika-55 nga minuto aron pagsilyo sa daog sa DBTC.
Gumikan sa impresibo niyang salida sud sa tulo ka adlaw nga torneyo, si Songalia maoy gibayaw nga Most Valuable Player.
Misakmit sab og pasidungog ang iyang mga teammates diin si Gian Renzo Costado maoy best striker, si Natan Lingatong maoy best defender, ug Ezralph Legara maoy best goalkeeper. Duna hinooy nabira Vince Michael Sinoy sa DBBH isip best midfielder.
Sa sangka alang sa ikatulong dapit, ang Abellana National School (ANS) milampaso sa Sacred Heart School-Ateneo de Cebu (SHS-AdC), 3-0, pinaagi sa penalty shootout. Sila si John Tajanlangit, John Largado, ug Mathew Naces maoy nagtuboy sa ANS ngadto sa kadaogan.