CHBC-Cebu Landmasters kampiyon sa CYBL Summer
CEBU, Philippines — Ang CHBC-Cebu Landmasters mitagak og 23-6 nga bomba sa pinal nga singko minutos sa aksiyon aron pakagingon ang Ballerhood, 97-87, ug sakmiton ang kampiyonato sa Cebu Youth Basketball League (CYBL) Summer Showcase sa Alta Vista Golf and Country Club.
Alkansi og sayes puntos, 75-81, sa nahibilin nga sayes minutos sa duwa, ang Cebu Landmasters luyo sa pagtambayayong nilang Raffy Celis, Mike Asoro ug Rota milusad og madasigon nga resbak aron yano kini nilang paphaon dayon na ngadto sa pagposte og 89-81 nga labaw.
Si Jerwin Espina milansang og tres aron pagpaduol sa Ballerhood sa katapusang higayon, 84-89, gumikan kay si Batang Gilas U16 pool member Jared Bahay ug Asoro nagtambayayong sa 6-0 run nga nakapaginhawa og lawom sa Cebu Landmasters, 93-84.
Ang makalisang nga dunk ni Know The Culture tournament MVP Raffy Celis ug ang duha ka two free throws ni Bahay sa hilimatyong segundos maoy nagsilyo sa naglagiting nga kalamposan sa Cebu Landmasters.
Si Asoro maoy nangu sa Cebu Landmasters uban ang 21 puntos ug gisundan kini ni Bahay nga mihipos og 17 puntos ug lima ka assists. Si Jhoernel Tangkay miamot og 15 puntos ug duha ka steals samtang si Celis mirehistro og double-double uban ang 14 puntos ug 10 ka rebounds.
Si Celis giduyogan sa "Know The Culture Mythical 5" nilang Kline Ochavo ug Santos Go sa Ballerhood, Glenn Conrtado sa Tisa Basketball, ug Earl Vincent Aguilar sa Green Rose Centre for Academe.
Sa sangka alang sa ikatulong dapit, si Eugene Angtud mipabuto og 21 puntos sa dihang gipaluhod sa Green Rose ang Tisa Basketball, 61-52.
- Latest
