CEBU, Philippines — Ang Softbatch mikulit og kasaysayan human sila nakaipsot batok sa Got Shot, 70-68, sa kulbahinam nilang kampiyonato aron paglangkat sa labing unang korona sa Cebu Women's Basketball League (CWBL) ning bag-ohay pa lamang didto sa Capitol Parish Gym sa may dalan Escario ning dakbayan sa Sugbu.
Si Jessamin "Saki" de los Reyes mipabuto og 25 puntos hinungdan nga mao kini ang gibayaw nga Finals Most Valuable Player.
Miamot si Darlene Ragasajo og 13 puntos samtang si Sharlyn Owatan midugang og 12 puntos alang sa Softbatch.
Si Owatan sa sayo pa maoy gipasidunggan nga regular season MVP. Giduyogan siya sa Mythical Five sa teammate niyang si Babiena Cabalhin, Fatima Quiapo sa Bright Star, Shaina Demape sa Artium, ug Niclen Manlimos sa Got Shot.
Si Quiapo mitagak og 17 puntos sa dihang gipakaging sa Bright Star ang Artium, 62-58, aron pagpahiluna sa ikatulong dapit.
Giorganisa ni coach Arnel Salado, ang buena manong season sa CWBL nahimong posible tungod sa suporta sa Sunsport Basketball pinaagi sa manedyir niining si Andrew Choachuy, coach Van Halen Parmis, Eric Henry Tejano, Odysssey Ship Management, Got U Prints and Party Favors, Icrazy English, ug Cruzkola/Black Mamba Energy Drink.
Mga iskor
Championship
Softbatch (70) — Delos Reyes 25, Ragasajo 13, Owatan 12, Cabalhin 9, Villarente 6, Antiola 4, Cuadero 1
Got Shot (68) — Carcasona 20, Salado 17, Tapinit 7, Tañeza 7, Yncierto 6, Estal 5, Manlimos 3, Villariza 3
Para 3rd
Bright Star (62) — Quiapo 17, Lubiano 12, Zarate 11, Durias 7, Enaje 4, Pantujan 4, Del Castillo 3, Lantice 2, Tautjo 2
Artium (58) — Demape 23, Cogtas 12, Demana CAP10, Soco 8, Fajardo 4, Mendaros 1.