Cebu basketball stars mobanat sa San Isidro, Leyte Fiesta Cup

CEBU, Philippines — Usa ka panon sa mga Sugbuanong basketball stars ang tataw nga masentro sa atensiyon sa dihang mowadwad sila sa ilang abilidad sa San Isidro, Leyte (SIL) Fiesta Cup 2022 Basketball League nga gikatakdang sugdan karong Miyerkules, Abril 27, didto sa San Isidro Sports and Civic Center.

Ang makalingaw nga si Eliud Poligrates ug si Shaq Imperial, ang 2019 Cebu Schools Athletic Foundation, Inc. (CESAFI) Most Valuable Player, maoy mangu sa San Isidro Wings uban nilang Enrico Llanto ug Dyll Roncal.

Duha ka langyawng magduduwa nga sila si Landry Sanjo sa Cameroon ug Arnaud Noah sa Nigeria ang mopalig-on sa Wings ubos sa ni coach Mike Reyes.

Si Reyes ug Imperial naglaraw sa ikatulo nilang sagunson nga titulo diin dila magkauban. Human gituboy ang Southwestern University (SWU)-Phinma Cobras ngadto sa korona sa 2019 CESAFI season, naghiusa sila og balik uban sa KCS-Mandaue Computer Specialists nga milugwa nga labing unang Visayas champions sa Pilipinas VisMin Super Cup sa miaging tuig.

Sa laing bahin, ang uban pang mga bitoon sa CESAFI nga sila si Joseph Nalos, Shane Menina, Joshua de la Cerna, Bernie Bregondo, Alwin Aguirre, ug JC Escalona mopakita'g aksiyon alang sa Tabango Lycans.

Ilang igkauban sila si Froilan Mangubat, nga bag-ohay pang gikoronahan isip CESAFI 3-point king, Russell Moneva, Ranel Cortes, Barok Ceniza, Chris Regero, Joseph Cabahug, Anchor Igot, Ernest Fajardo, ug Jun Dagoy.

Ang Wings ug ang Lycans gipaabot nga magsagubang og malisud nga hagit batok sa  OCCCI Ormoc Sheer Masters, nga mitapos sa ikaduhang dapit sa bag-ohay pang natapos nga pasiunang komperensiya sa 2022 Pilipinas VisMin Super Cup. Nagpakuyaw sa puwersa sa Sheer Masters ang duha niini ka Nigerian imports nga sila si Eugene Toba ug Chebueze Ikeh.

Ang laing entrante ning unom ka adlaw nga torneyo nga hugtanong gipaluyohan ni San Isidro, Leyte Mayor Bebot Veloso mao ang Calubian team.

Moduwa sila og single round robin, diin ang top 2 teams mag-abot sa best-of-three finals.

Ang makampiyon mobulsa og P100,000 samtang ang mopahiluna sa ikaduha ug ikatulong dapit makadawat og P60,000 ug P40,000.   

Ang tanang mga duwa ubos sa superbisyon ni tournament commissioner Atty. Rem Beryl Y. Veloso. Mo-abag kaniya sila si Atty. Jay L. Viagedor ug Sangguniang Kabataan Federation (SKF) President Armin Joseph Ebales.