Sunsport basketball camp mobalik na

CEBU, Philippines — Mobalik na ang Sunsport Basketball Training Camp apan limitado lamang ang mga entrante alang sa 2022 niining season nga sugdan karong Anril 5 diha sa Sacred Heart Center Sports Club sa dalan D. Jakosalem ning dakbayan sa Sugbo.

Si Sunsport manager Andrew Choachuy nagkanayon nga mo-akomodar lamang sila og 30 ka mga partisipante sa pagka karon aron pagseguro nga ang tanang mga patakaran sa panglawas ug kaluwasan istriktong masunod.

"30 participants lang sa ta for now para maka-practice mi og monitor sa safety protocols," matud pa ni  Choachuy. "And if maka-familiar nami, probably by May mag-add ta anam-anam."

Ang umaabot nga summer clinic sa Sunsport abli sa mga batan-ong basketbolista nga nag-edad og 12 ngadto sa 19 anyos.

Kinahanglan nga hingpit na silang nabakunahan batok sa Covid-19. Ang training session ipahigayon matag Martes ug Huybes, gikan sa alas-10 sa buntag hangtud sa alas-12 sa udto.

Alang sa dugang detalye, mahimong mokontak ni coach Jojo sa 0928-8295489.