"Santino" hugtanong nag-training sa Wild Card
CEBU, Philippines — Doble kayod karon si WBO No. 8 super bantamweight contender Jeo “Santino” Santisima pagbaid sa iyang abilidad didto sa Amerika alang sa umaabot niyang away batok ni kanhi two-time world title challenger Joet Gonzalez karong Pebrero 5 didto sa Save Mart Center sa Fresno, California. Ang 25-anyos nga si Santisima naabot sa Los Angeles niadtong Disiembre 31 kauban ang dugay na kaayo niyang trainer nga si Michael Domingo nga mao say naghashas sa iyang talento sa ilang panahon uban sa nanirado nang ALA Gym.
Nagbansay-bansay gilayon sila sa notadong Wild Card Gym ni Hall of Fame trainer Freddie Roach didto sa Hollywood.
Si Santisima nagkanayon nga nag-training siya uban sa kanhi niya stablemate ug WBO International featherweight champion Mark “Magnifico” Magsayo ug kanhi WBO bantamweight champion Marlon Tapales didto sa tugkaran ni Roach.
Naka-sparring sab sa garbo sa Aroroy, Masbate ang kababayan niyang IBF super flyweight champion nga si Jerwin Ancajas ug ang Armenian world title challenger nga si Azat Hovhannisyan nga dako kaayo og tabang sa makuti niyang preparasyon batok ni Gonzalez. Si Santisima nagkupot og 21-3 record uban ang 18KOs samtang si Gonzalez nagtangag og 24-2 nga baraha uban ang 14KOs.
- Latest
