Alas sa NLEX maoy Player of the Week
CEBU, Philippines — Literal nga nakadiga og alas ang NLEX Road Warriors gumikan kay ang kapitan nilang si Kevin Alas maoy gibayaw nga labing unang Player of the Week sa PBA Governors’ Cup.
Si Alas mireshistro og average nga 16.5 puntos, 6.0 assists, ug 4.0 rebounds sa duha nila ka sagunson nga daog batok sa San Miguel Beermen ug NorthPort Batang Pier hinungdan sa temporaryo nilang paghari sa liderato karon uban ang Phoenix Super LPG.
Mihipos siya og 12 puntos, walo ka assists ug upat ka rebounds sa 114-102 nilang pagpakaging sa Beermen sa una nilang duwa didto sa Ynares Sports Arena sa Pasig City. Duha ka adlaw ang milabay, ang 30-anyos nga guard gikan sa Letran mibugha og 21 puntos, upat ka rebounds ug upat ka assists sa dihang gipiog sa NLEX ang NorthPort sud sa overtime, 120-115.
Gipukan ni Alas sa senemanang pasidungog sila si Chris Banchero ug Matthew Wright sa Phoenix Super LPG Fuel Masters, nga 2-0 na sab karon human gipukan ang Terrafirma ug Blackwater.
- Latest
