Knicks gibugha ang Lakers

CEBU, Philippines — Si Evan Fournier mi-iskor og 26 puntos samtang si Immanuel Quickley mibubo og 12 sa iyang 14 puntos sa katapusang sa dihang gipayaka sa New York Knicks ang Los Angeles Lakers, 106-100, sa NBA kagahapon didto sa Madison Square Garden sa New York.

Miduwa nga wala ang suspendido nilang superstar nga si LeBron James, ang Lakers nalubong og 25 puntos sa ikaduhang kuwarter. Nakatabla sila duha ka higayon sa ikatulong kuwarter apan wala gihapon makamaneho pag-abante bisan pa man sa triple-double nga 31 puntos, 13 ka rebounds ug 10 ka assists gikan ni Russell Westbrook.

Bisan og na-foul trouble sa naghinapos nga bahin sa duwa, si Julius Randle misidlak gihapon uban sa Knicks bitbit ang 20 puntos ug 16 ka rebounds.

Ang sidekick ni James nga si Anthony Davis mipakita’g aksiyon bisan og dunay dili maayong gipamati sa iyang lawas. Mihipos siya og 20 puntos ug unom ka rebounds sa pilderong kawsa.

Si Avery Bradley dunay 15 puntos samtang si Carmelo Anthony midugang og 12 puntos alang sa Lakers nga napukan sa ikaupat nga higayon sa miagi nilang lima ka duwa.   

Didto sa Detroit, si Tyler Herro migaling og 31 puntos ug walo ka rebounds sa dihang gipaksit sa Miami Heat ang Pistons, 100-92, pagsugod sa upat nila ka road trip.

Sila si  Jimmy Butler ug Bam Adebayo parehong mitali og 15 puntos alang sa Heat nga impresibong mibalitok human ma-alkansi og nuybe puntos pagsugod sa katapusang kuwarter dayon na ngadto sa pagpiog sa Pistons.

Si Jerami Grant maoy nangu sa pilderong Pistons uban ang 21 puntos ug pito ka rebounds.