Tuburan, Manga NHS midominar sa DepEd-7 sports skills demo contest

CEBU, Philippines — Ang mga estudyanteng atleta sa Tuburan National High School sa Cebu Province ug Manga NHS sa Tagbilaran City maoy nangharos sa Central Visayas regional selection sa labing unang Department of Education (DepEd) Sports Skills Demonstration Contest nga gipahigayon online sa miaging semana.

Gumikan sa impresibo nilang pagpasundayag sa ilang abilidad sa taekwondo inubanan sa maanindot nga choreography, ang Tuburan NHS maoy milugwa nga overall champion bitbit ang labing taas nga average score nga 92.40 puntos gikan sa lima ka judges gamit ang online scoring system.

Ang Manga NHS, nga dalaygon sab kaayo ang pagpakita sa ilang talento as basketball, mipahiluna sa ikaduhang dapit uban ang 88.60 puntos.

Ang Tuburan mibulsa og P25,000 samtang ang Manga nakadawat og P20,000 nga ganti. Gawas niini, naka-angkon sab sila og katungod nga morepresenta sa Central Visyas sa National Finals sunod semana diin ang maghari mokubra og P75,000.

Sa laing bahin, ang Valencia Tech Voc High School sa Bohol ug Jovencio Masong NHS sa Bogo City mibira og P15,000 ug P10,000 tungod sa pagpahiluna nila sa ikatulo ug ikaupat nga puwesto uban ang 88.00 ug 86.60 puntos.

Naglangkob sa top 10 mao ang Abellana National School sa Cebu City, Junob NHS of Dumaguete City, City of Bogo Science and Arts Academy, Beatriz D. Durano MNHS of Danao City, Madridejos NHS (Bantayan Island) of Cebu Province, ug Bayawan City NHS.