Philippine Para Dancesport team nangharos sa polish open

CEBU, Philippines — Ang Philippine Para Dancesport Team mihakot og 19 ka medalya nga gibuak ngadto sa pito ka golds, upat ka silver ug walo ka bronze sa Polish Para Dance Sport Open 2021, usa ka world qualifying tournament nga gipahigayon niadtong Oktubre 8-10 didto sa Lomianki, Poland.

Si Edelyn de Asis misidlak nga labing hayag sa mga pambato sa Pilipinas human milabni og upat ka bulawang medalya. Gibuntog niya si 2019 world champion Olena Chynka sa Ukraine sa women’s single freestyle 2 ug ingon man sa single conventional 2 event.

Nanghawod sab si De Asis sa rising junior competition. Gilangkat niya ang ikaupat niyang gold sa doubles freestyle 2 event uban ni Julius Obero. Ang mga kababayan nilang si Anne Charlaine Santos ug Christian Apolinario naka-bronze sa maong kategoriya samtang si Apolinario midugang og silver sa combi Latin class 1 uban ni Jhistine Gylde Baguio.

“Hindi ko akalain na ganun ang pagtanggap ng mga hurado sa mga bagong mukha natin. Seguro dahil talagang inaabangan nila ang mga produkto ng Pilipinas, yung mga atleta na alam nila na matindi ang mga trainings sa Pilipinas. So ganun tayo kahinahangaan dito,” matud pa ni Phl Para Dancesport Team head coach Genice “Bong” Marquez sa dihang nahinabi sa PTV Sports.

Wala sab magpabitin ang Sugbuanon nga si Rhea Marquez, lumad gikan sa Barangay San Isidro, dakbayan sa Talisay, ug ang partner niining si Julius Obero nga mipugnit og duha ka golds sa dihang gi-sweep sa Team Phl ang combi latin class 2 ug freestyle combi class 2      events.

Sila si De Asis ug Shaquille Hanz Basan maoy miangkon sa silver ug sila si Anne Charlaine Santos ug Jed Villaruel maoy mikubit sa bronze sa combi latin class 2, samtang sila si Jhona Pena ug Felimon Baguio II maoy naka-silver ug sila si Anne Charlaine Santos ug Jed Villaruel ang mipunit sa bronze sa freestyle combi class 2.

Namina sa Team Phl ang ikapito niining bulawan sa doubles standard class 2 luyo sa paningkamot nilang Jhona Pena ug Joey Maglasang, nga nakadaog sab og bronze sa solo men’s class 2 freestyle.

Silang tanan nga nakamedalya sa Polish Open naka-angkon og katungod nga morepresenta sa Pilipinas sa 2021 World Para Dance Sport Championships nga gikatakda karong Nobiyembre 26-28 didto sa  Ulsan, South Korea.

“Plano ko para sa Para Dancesport Team ay mas gagalingan pa, mas konkretong plano para pagdating nang araw as in matibay, mas matibay pa tayo,” pasalig pa ni coach Bong Marquez.