CEBU, Philippines — Gituldokan na sa hingpit ni Paul Gasol ang mabulokon niyang karera sa NBA nga milanat og 18 ka tuig.
Pormal nga gipahibawo ni Gasol ang iyang desisyon kagahapong adlawa.
Si Gasol nakaduwa kanhi sa LA Lakers diin siya nakaporma og talagsaong panaghigalaay uban ni Kobe Bryant. Sa ilang pagtambayayong, ilang gitunolan ang Lakers og duha ka kampiyonato niadtong 2009 ug 2010 NBA sesons.
Bililhon kaayo si Gasol sa LA franchise. Timaan niini, pormal nga iretiro sa Lakers ang iyang No.16 jersey.
Ang kombinasyon sa gitas-on, talento ug utok naghimo ni Gasol nga usa sa labing ngilngig nga big man sa kasaysayan sa NBA.
Ang 41-anyos nga si Gasol nakaduwa og 18 ka seasons sa liga, pito niini uban sa Lakers nga mikuha kaniya gikan sa Memphis Grizzlies pinaagi sa usa ka trade niadtong 2008.
“It’s a difficult decision after so many years,” matud pa ni Gasol. “But it’s a decision that I really thought over.”
Sa iyang panahon sa Lakers, si Gasol mi-average og 17.7 puntos, 9.9 rebounds, 3.5 assists ug1.4 blocks.
Ang 2002 Rookie of the Year kaunom nahimong All-Star ug upat ka higayon nasakop sa All-NBA Team.
Gawas sa Lakers ug Grizzlies, nakaduwa sab siya uban sa Chicago Bulls, San Antonio Spurs ug Milwaukee Bucks.
Miyembro siya sa Spain national team nga naka-silver medal sa 2008 Beijing ug 2012 London Olympics ug ingon man bronze sa 2016 Rio Olympics.
Si Gasol no.3 pick overall sa Atlanta Hawks niadtong 2001 Draft. Nakapirma sab siya og kontrata sa Portland Trail Blazers niadtong 2019 apan pareho siyang wala makaduwa sa maong mga koponan.