Casimero gitiradahan silang Donaire ug Inoue
CEBU, Philippines — Human milampos pagdepensa sa iyang WBO bantamweight title pinaagi sa split decision batok ni Guillermo Rigondeaux sa makaduka nilang away nga naputos og pagsaway gumikan sa pagsige og dagan-dagan sa Cuban challenger niadtong Dominggo, duna nay nakahan-ay nga plano si John Riel “Quadro Alas” Casimero.
Ang three-division world champion gikan sa Ormoc City way kurat nga mipadayag nga buot niyang gukdon sunod ang kababayan niyang si Nonito “The Filipino Flash” Donaire o ang gikaintapang Japanese ‘Monster’ nga si Naoya Inoue.
Si Donaire maoy kasamtangang WBC bantamweight champion samtang si Inoue ang hari sa IBF ug WBA ubos sa 118-pound division.
"This is my plan, three people," dason pa ni Casimero ngadtong Showtime host Jim Gray human sa away nila ni Rigondeaux didto sa Dignity Health Sports Park sa Carson, California.
"First, Rigondeaux is finished. Second, (Nonito) Donaire. "Next, (Naoya) Inoue," dugang pa sa 31-anyos nga si Casimero.
Sila si Casimero ug Donaire gikatakda na untang mag-away niadtong Agosto 15 apan nadiskaril kini human ang duha ka kampo nagkasungi gumikan sa isyu sa drug testing nga natiwasan pa sa gihimong pag-insulto ni Casimero sa asawa ni Donaire nga si Rachel
Samtang si Casimero na-iskedyul na untang makigbugno ni Inoue niadtong Abril sa miaging tuig didto sa Las Vegas apan nakasela kini tungod sa pagulbo sa kalibutanhong pandemiya.
Ning higayona, si Casimero nanghinaut nga mahinayon na ang gihandum niyang mga away uban ang tinguha nga haroson og daog ang tanang mga bakus sa bantamweight division aron makab-ot ang iyang damgo nga mamahimong usa ka undisputed champion.
"Hopefully soon, lalaban na sila, hindi na sila matatakot,” batbat pa ni Casimero.
- Latest
