Prangkisa sa KCS sa VisMin Super Cup ibaligya
CEBU, Philippines — Mapaubsanong miangkon nga dili na niya makaya ang pinansiyal niyang obligasyon sa team, ang tag-iya sa KCS Computer Specialist nga si Ricky Verdida mipahibawo nga ibaligya na lang niya ang iyang prangkisa sa Pilipinas VisMin Super Cup.
Bug-at man tuod sa iyang dughan apan gipakanaog ni Verdida ang malisud nga desisyon usa ka adlaw human ang KCS mitapos nga first runner-up sa labing unang Chooks-to-Go Pilipinas VisMin Super Cup Southern Finals human gi-sweep sila sa Jumbo Plastic-Basilan Peace Rides sa ilang best-of-five finals series niadtong Biyernes didto sa Pagadian City gymnasium sa Zamboanga del Sur.
“Hindi na kaya. Nabaon na sa utang,” pasabot pa ni Verdida. “I want to continue but at the same time, I need to take care of my family.” Nanghinaut si Verdida nga dunay makasagop sa iyang team sa labing dali nga panahon ilabi na kay ang ikaduhang komperensiya sa VisMin Cup gikatakda na mang sugdan karong Oktubre.
“If there’s someone interested, it would be great so that my players can still have work,” paambit pa ni Verdida, nga way bisan gamay nga pagmahay bisan pa man sa tanang mga pagsulay ug kalisdanan nga ilang naagian.
- Latest
