KCS-Mandaue nasugamak na sab sa Super Cup Finals
CEBU, Philippines — Nagdagma na sab ang KCS Computer Specialist-Mandaue City, ning higayona sa sikit nga 96-91 nga desisyon batok sa Jumbo Plastic-Basilan Peace Riders sa Game 2 sa best-of-five 2021 Chooks-to-Go Pilipinas VisMin Super Cup Southern Finals niadtong Huybes sa gabii didto sa Pagadian City gymnasium sA Zamboanga del Sur.
Bitbit ang 2-0 nga bentaha, mahimo nang humanon sa Basilan ang serye ug mokulit og kasaysayan isip labing unang grand champion sa Vismin Super Cup kon ugaling ilang tiwasan ang KCS-Mandaue sa Game 3 nga giduwa pa samtang sa pagsuwat ning taho kagabii.
Nindot unta kaayo ang gipakitang labok sa KCS-Mandaue nga nakasikit ngadto na lang sa dos puntos, 81-83, human sa basket ni Joseph Nalos sa nahibilin nga 5:14 sa duwa.
Apan ang Basilan miresbak sab dayon pinaagi sa 8-0 run nga gilusad nilang Michael Mabulac, Jay Collado, ug Hesed Gabo aron sa pagginhawa nila og lawom sa pinal nga 2:31 sa aksiyon. Si Jonathan Uyloan maoy nangu sa Basilan uban ang 19 puntos, upatn ka steals ug tagurha ka rebounds ug assists, samtang si Collado miamot og 17 puntos, lima ka rebounds ug upat ka assists.
Wa sab magpa-alkansi si Mabulac nga mipupo og 13 puntos ug 14 ka rebounds ug ingon man si Jong Baloria nga mitali og 11 puntos ug unom ka rebounds. Si Rhaffy Octobre mipabuto og 27 puntos, samtang sila si Gileant Delator, Shaq Imperial, ug Phil Mercader mikadlit og 12 puntos matag usa alang sa pilderong KCS-Mandaue.
- Latest
