CEBU, Philippines — Nagsandig ang Dumaguete City Warriors nilang Ronald Roy ug Jaybie Mantilla sa ilang pagpukan sa Tabogon Cebu Voyagers, 67-65 sa stepladder playoffs sa 2021 Chooks-to-Go Pilipinas VisMin Super Cup niadtong Sabado didto sa Alcantara Civic Center sa Alcantara, Cebu.
Dili hinuon basta-basta ang ilang pakigbisog kay miagi pa kini og overtime una maangkon ang munas ginhawa nga kadaogan, ingon man ang katungod sa pakigbatok sa ARQ Builders Lapu-Lapu City Heroes alang sa katapusang lingkoranan sa semifinals nga kasamtangan giduwa sa pagsulat niining balita.
Nagtabla ang iskor, 63-all sa overtime, si Roy midugkal og usa ka 3-pointer nga mipaabante sa Warriors, 66-63 sa nahabiling 1:37 sa aksiyon. Misikit ang Voyagers, 65-66 human sila si Jethro Sombero ug Harold Arboleda mitusak og tagsa ka free throw.
May purohan unta nga makuha sa Voyagers ang labaw, apan ang guwardiya nga si Joemari Lacastesantos nakahimo og dako nga sayop dihang nangayo kini og timeout bisan og nahurot na hinungdan nga gipitohan sila og "technical foul." Si Mantilla mikombertir sa technical free throw aron inaton ang labaw, 67-65 sa katapusang siyete seguntos.
Ang Voyagers gihatagan og duha ka higayon aron modaog o mohatod sa duwa sa ikaduhang overtime, apan si Arboleda nasipyat sa iyang 3-pointers, samtang si Arvie Bringas napakyas sa iyang fade-away jumper dayong kapupos sa oras.
Ang kanhi MVP sa CESAFI nga si Mantilla mihimo og double-double performance sa laing unang overtime sa liga. Mihipos siya og 24 puntos ug 12 ka rebounds.
Si Mark Doligon mihimo sab og double-double pinaagi sa iyang 17 puntos ug 10 ka rebounds ug ingon man si Roy nga dunay 11 puntos ug 12 ka rebounds.
Ang natagak nga Tabogon gipangulohan ni Bringas nga miugkat og 18 puntos ug 21 ka rebounds, gisundan ni Lacastesantos pinaagi sa iyang 10 puntos ug siyam ka rebounds.