CEBU, Philippines — Gidominar sa team Pardo ang 2nd Cebu City Grassroots Online Dancesport Competition human mikabkab og 10 ka gold, lima ka silver ug tulo ka bronze medals niadtong weekend.
Si Hannah Joy Baculi maoy nangu sa Pardo nga mihakot og tulo ka bulawan sa junior 1 female chachacha, rumba ug jive.
Midugang og duha ka bulawan si Michael Mirabueno pinaagi sa juvenile 1 jive ug samba, samtang ang iyang igsuon nga si Michaela mitunol og usa ka gold sa juvenile 1 female samba. Ang ilang teammates nga silang Kathlene Oberio ug Jearhiaa Angela Dela Cerna mitapos sa ikaduha ug ikatulo sa juvenile 1 female jive, samtang si Khalil Bloom Guitche nidaog og bulawan sa juvenile 2 jive ug usa ka silver sa chachacha.
Wala sab palupig sila si Sophia Pacanza ug Samantha Delantar nga mikubkob og bulawan ug silver matag usa.
Ang Labangon maoy mipahiluna sa ikaduha uban ang lima ka gold, siyam ka silver ug siyam sab ka bronze medals.
Ang tandem nilang Mary Joy Marzon ug Ariane Generalao maoy nangu sa Labangon nga mikabkab og tulo ka bulawan.
Nalandig sa ikatulo ang Tisa nga adunay tulo ka golds luyo sa mga paningkamot ni Ron Jansent Barredo.
Ang Sibonga ug Punta Princesa mi-okupar sa mosunod nga duha ka puwesto nga parehong adunay duha ka golds ug usa ka silver. Si Lemuel Jay Navarro maoy mitunol sa tanang medalya sa Sibonga ug si Ron Jesreyl Barredo sa Punta Princesa.
Ang City Central School mihipos og duha ka golds, tulo ka silvers ug upat ka bronzes, gisundan sa Inayawan nga may tag-usa ka gold, silver ug bronze medal, samtang ang Guadalupe mihakot og usa ka gold, usa ka silver ug duha ka bronze medals.