CEBU, Philippines — Human sa duha ka adlaw nga pahuway, ang aksiyon sa Visayas leg sa unang season sa Chooks-to-Go Pilipinas VisMin Cup mobalik karong adlawa uban ang tulo ka duwa didto sa Alcantara Civic Center sa lungsod sa Alcantara, sa habagatan-sidlakan sa Sugbo.
Ang mga nag-unang kontender MJAS Zenith/Talisay City Aquastars ug ang ARQ Builders/Lapu-Lapu City Heroes laraw nga mokulit sa ilang ikaduhang sunod-sunod nga daog dihang ilang harungon ang tagsa-tagsa nilang mga kaatbang ning labing unang professional basketball league sa nasud nga nagbasi sa habagatang mga probinsya.
Ang Aquastars makigsangka sa KCS/Mandaue City Computer Specialists main game sa alas-8 sa gabii, samtang ang Lapu-Lapu Heroes makigbatok sa Dumaguete City Warriors sa pasiunang duwa sa alas-2 sa hapon sa dili pa mohamag ang Tabogon-Cebu Voyagers sa Tubigon-Bohol Mariners nga gikatakda sa alas-5 sa hapon.
Ubos sa liderato ni skipper Paulo Hubale, Cebuano 'Assassin' Patrick Cabahug uban nilang Jan Jamon, Val Acuña, Jaymar Gimpayan, Lord Casajeros, Egie Boy Mojica ug Jhaymo Eguilos, ang Aquastars mihatag og mensahe nga seryoso sila sa ilang kampanya alang sa korona pinaagi sa pagkulit og makabungog nga kadaogan batok sa the Tubigon-Bohol Mariners,104-66 sa labing unang duwa sa Super Cup.
Hinuon, ang Aquastars gilauman nga moatubang og lisud nga hagit ning higayona batok sa sama nila kalig-on nga Computer Specialists, kinsa gikan nihaw-as sa 66-46 nga kadaogan batok sa Siquijor Mystics.
Aron makuha ang sunod-sunod nga daog, ang Computer Specialists kinahanglan magsandig gihapon sa talagsaong salida gikan nilang Gryann Mendoza, Al Francis Tamsi, Rhaffy Octobre, Monic Soliva ug ex-CESAFI Most Valuable Player Shaq Imperial ug uban pa.
Sa laing bahin, ang Lapu-Lapu Heroes maglaum nga mausban ang ilang daog dihang harungon nila ang Tabogon Voyagers sa katapusang duwa karong adlawa.
Ang mga beterano nga silang Jojo Tangkay, Reed Juntilla, Ferdinand Lusdoc, Jerrick Canada, Hafer Mondragon ug Rino Berami mao na sab ang moalsa sa palas-unon sa Lapu-Lapu Heroes uban sa suporta sa ilang batan-on nga mga tirador sama nilang John Abad, Fletcher Galvez, Dawn Ochea ug Rendell Senining.
Sangkaon sa Lapu-Lapu Heroes ang Dumaguete Warriors, kinsa miyukbo ngadto sa Siquijor Mystics, 100-105 sa ilang unang duwa sa liga tulo ka gabii na ang nilabay.
Sila si James Regalado, Ronald Roy ug kanhi-CESAFI MVP Jaybie Mantilla mao ang pipila nga gisaligan sa Dumaguete Warriors nga nagtinguha moiskor og daog batok sa inilog nga Lapu-Lapu Heroes.