CEBU, Philippines — Mikabkab og 22 puntos si Marcus Morris alang sa Los Angeles Clippers nga milubong sa piangon nga L.A. Lakers, 104-86 sa nagpadayong aksiyon sa National Basketball Association kagahapon didto sa Staples Center sa Los Angeles, California.
Si Kawhi Leonard adunay 19 puntos, 10 ka rebounds ug walo ka assists, samtang si Paul George mitampo og 16 puntos sa Clippers. Ang Lakers niduwa nga wala ang ilang All-Star duo nga silang LeBron James ug Anthony Davis tungod sa injury, ingon man silang Andre Drummond ug Wesley Matthews.
Si Montrezl Harrell maoy nangu sa Lakers uban ang 19 puntos batok sa iyang kanhi koponan. Si Marc Gasol mao lang ang bugtong starter nga nilansang og double figures sa iyang 11 puntos, samtang si Kyle Kuzma nalimitahan lang ngadto sa sayes puntos alang sa Lakers nga maoy naggukod sa tibuok duwa.
Ang Clippers milansang sa ilang double-digit nga labaw sa tunga-tunga sa second period ug ila kining naprotektahan hangtod nahurot ang oras sa duwa.
Milusad og 12-3 run ang Clippers pagsugod sa third period uban sa 3-pointer ni George aron moposte sa ilang kinadak-ang labaw ngadto sa 24 puntos.
Didto sa Chicago, si Nikola Vucevic mikadlit sab og 22 puntos uban ang 13 ka rebounds, samtang si Zach LaVine mitampo og 25 puntos sa Chicago Bulls nga mikunis-kunis sa Brooklyn Nets, 115-107 aron pagpakgang sa ilang unom ka sunod-sunod nga pilde.
Si Tomas Satoransky mihimo'g season-high 19 puntos ug 11 ka assists dihang ang Bulls midaog sa unang higayon sukad nila nakuha si Vucevic sa wala pa ang trade deadline.
Mikolekta og 24 puntos si Kyrie Irving ug adunay 15 ka assists aron pangulohan ang Nets, kinsa niduwa nga wala silang James Harden ug Kevin Durant. Si Jeff mihipos og 21 puntos gikan sa bench sa Nets.
Ang Nets nilabaw og nuybe puntos sa first period, apan ang bangis nga Bulls padayong miungad hangtod nailog ang tres puntos nga labaw, 28-25 human sa unang kuwarter. Gitapos sa Bulls ang first half pinaagi sa 16-5 run ubos sa pagpangulo ni Satoransky nga adunay nuybe puntos.