CEBU, Philippines — Nagtampohay og 26 puntos silang Devin Booker ug Deandre Ayton, samtang si Chris Paul mihimo og "triple-double" sa iyang 11 puntos, 13 ka assists ug 10 ka rebounds sa Phoenix Suns nga mipahubas sa Los Angeles Lakers, 111-94 sa NBA kagahapon didto sa Phoenix.
Ang Los Angeles niduwa nga wala ang 17-time All-Star LeBron James sa ikaduhang higayon karon nga season ug ang Lakers adunay 0-2 nga wala ang ilang superstar.
Si James nakahiagom og ankle injury atol sa 99-94 nga kapildihan sa Lakers ngadto sa Atlanta Hawks niadtong Domingo ug gilaumang dugay pa kini makabalik og duwa.
Naglisud ang Lakers sa ilang opensa diin aduna lamang kini 41 shooting percentage gikan sa field.
Si Montrezl Harrell maoy nangu sa Lakers nga mikandos og 23 puntos diin mipasud kini og 10 sa 13 ka itsa. Si Dennis Schroder mikabo og 22 puntos.
Ang Suns miabli sa fourth quarter pinaagi sa pagposte og 88-76 nga bentaha. Miaksiyon og sikit ang Lakers, 96-89 sa nahabiling 6:33 human si Schroder mipasud og usa ka technical free throw batok ni Paul, apan ang Suns mitubag uban ang sagunsong pito ka puntos ug miinat sa labaw alang sa ilang ika-17 ka daog sa 21 ka mga duwa.
Si Paul maoy ikaunom nga player sa kasaysayan sa NBA nga nihimo og 10,000 ka assists human sa iyang alley-oop pass ngadto ni Ayton alang sa usa ka dunk sa third period.
Ang lain pang mga magduduwa sa kasaysayan sa liga nga adunay daghang assists mao sila si John Stockton, Jason Kidd, Steve Nash, Mark Jackson ug Magic Johnson.
Didto sa New York, mipasud og duha ka free throws si Tobias Harris sa nahabiling 5.3 segundos sa overtime aron agakon ang Philadelphia 76ers ngadto sa 101-100 nga kadaogan batok sa New York Knicks.
Ang 76ers miinat sa ilang daog batok sa Knicks ngadto sa 15 ka duwa ug aduna na'y 30-13 aron pabiling mag-una sa Eastern Conference standings.
Si Julius Randle miiskor og 24 puntos aron mangu sa scoring sa Knicks nga ikapito sa East standing uban ang 21-22 nga baraha.
Didto sa Denver, sila si Brandon Ingram ug Zion Williamson mikadlit og 30 puntos matag usa alang sa New Orleans Pelicans nga mipilde sa Denver Nuggets, 113-108 bisan pa sa "triple-double" ni Nikola Jokic.
Si Nickeil Alexander-Walker mitampo og 20 puntos alang sa Pelicans nga nidaog sa katapusang nilang road game human mapilde ngadto sa ilang unang duha ka duwa didto sa Portland.
Si Jokic adunay 29 points, 10 ka rebounds ug 10 sab ka assists alang sa iynag ika-52 nga career triple-double, apil na ang 11 karon nga season. Si Jamal Murray miambit og 23 puntos.