CEBU, Philippines — Segun sa gilauman, si Joshua Munzon maoy napili nga No. 1 overall sa PBA Season 46 Rookie Draft sa Terrafirma Dyip niadtong Domingo.
Ang 26-anyos nga si Munzon maoy misignit sa kadayagan sa draft nga gipahigayon ubos sa usa ka virtual set-up human sa iyang dalaygon nga salida sa Asean Basketball League (ABL), PBA D-League ug PBA 3x3 basketball nga maoy taytayan aron mahimmong ilado.
Si Munzon nga aduna gitas-on nga 6-foot-4, maoy ikatulong No. 1 pick sa Dyip sunod nilang CJ Perez ug Roosevelt Adams.
Si Munzon gipaabot mopuli sa gibakantihang puwesto ni Perez, kinsa atua na nanimpad sa San Miguel Beermen atol sa offseason.
Ang NorthPort Batang Pier nibira ni Fil-Am Jamie Malonzo isip No. 2 pick.
Gibira sa NLEX Road Warriors isip No. 3 pick ang bitoon sa San Beda nga si Calvin Oftana nga naghatag og dalan sa ilang igauong koponan TNT Tropang Giga pagbira ni Mikey Williams alang sa No. 4 pick nga ilang nakuha gikan sa NLEX sa usa ka pre-draft trade.
Sa gilauman, gibira sab sa Rain or Shine Elasto Painters si Santi Santillan alang sa No. 5.
Ang Alaska Aces mikuha sa higante sa San Beda nga si Ben Adamos isip No. 6 pick sa first round.
Si Larry Muyang napili sa Phoenix Super LPG Fuel Masters sa ikapito, gisundan ni James Laput isip No. 8 sa Terrafirma. Si Alvin Pasaol maoy ikasiyam sa Meralco Bossing.
Gikuha si Jerick Ahanmist isip No. 10 sa Magnolia Hotshots ug si Troy Rike ika-11 sa NorthPort.
Ang Barangay Ginebra maoy mitapos sa hinagpatay sa first round pinaagi sa pagkuha ni Ken Holmqvist sa No. 12.