Bucks pilde gihapon sa Raptors

CEBU, Philippines — Gipilde na sab sa Toronto Raptors ang Milwaukee Bucks, 110-96 sa panagsangka nila og usab sa National Basketball Association kagahapon didto sa Fiserv Forum sa Milwaukee.

Natumbasan ni Norman Powell ang iyang season-high nga 29 puntos, samtang si Pascal Siakam mipugnit og 27 puntos  sa Raptors mitunol sa Milwaukee sa ikalima niining sunod-sunod nga pilde.

Si Powell mipasud og siyam sa 12 ka itsa sa field goal, upat sa pito gikan sa 3-point range ug kausa ra masipyat sa walo ka tira gikan sa free-throw line.  Mihipos siya og 15 puntos sud lang sa unang kuwarter ug mipasud og duha ka 3-pointers nga nagduslit sa  21-4 run alang sa komportabling labaw sa Raptors. Wala hinuon makaduwa si Jrue Holiday sa ikaunom nga sunod-sunod nga higayon tungod sa health and safety protocols sa liga.

Si Giannis Antetokounmpo  nga ginganglan isip All-Star Game starter sa ikalimang sunod-sunod nga higayon mihipos og 23 puntos, 12 ka rebounds ug walo ka assists sa wala pa ma-fouled out sa nahibiling 1:19 sa fourth quarter.

Nakatampo sab og dako sa daog si Fred VanVleet nga  miiskor og 17 puntos.

Ang Raptors mipukan sab sa Bucks, 124-113 sa ilang sangka niadtong Miyerkules bisan wala si Kyle Lowry tungod sa injury.

Si Donte DiVincenzo adunay 14 puntos, si Khris Middleton 13, Brook Lopez 12 puntos, samtang si Bryn Forbes mitampo og 11 puntos sa Bucks.

Sa laing mga aksiyon, ang Miami Heat mipaluhod sa Sacramento Kings, 118-110 ug ang Brooklyn Nets mipilde sab sa defending champion Los Angeles Lakers sa iskor nga 109-98.